Qazaqstan Prezidenti Qasym-Jomart Toqaev memlekettik bilik júiesine bilimdi ári kásibi turǵyda daiar, patriottyq turǵyda shyńdalǵan jastardy tartý kerektigin málimdedi, dep habarlaidy QazAqparat.
«Elimizde balabaqshalar men mektepterdiń, kolledjderdiń direktoryn taǵaiyndaýdyń ashyq júiesin daiyndaý kerek. Direktorlardy rotatsiia men attestattaýdan ótkizý institýtyn engizý – basqarýdyń tiimdiligin arttyrýy tiis. Jalpy, rotatsiia barlyq salada bolýy kerek dep esepteimin. «Adasyp ketken býyn» degen áńgimeler shyqpaýy úshin biz kadrlardy jańartyp otyrýymyz qajet. Shynynda da bilimdi ári kásibi turǵyda daiar, patriottyq turǵyda shyńdalǵan, psihikalyq turǵyda oily jastar men orta jastaǵylar memlekettik bilik salasynda eńbek etýi kerek. Parlament bolsyn, Úkimet, ákimdik bolsyn, jańa talanttardy izdeýge shaqyramyn. Kásibi turǵyda shyńdalǵan jastardy izdeýge shaqyramyn. Memlekettik bilik júiesinde olardyń darynyn paidalanýymyz kerek», - dedi Prezident Ulttyq qoǵamdyq senim keńesiniń otyrysynda.
Prezident qazir elde memlekettik qyzmetti reformalaý, jańa deńgeidegi memlekettik apparatty qurý bastamasy týraly aitylyp jatqanyn atap ótti.
«Álbette, osy rette, bizge jańa adamdar kerek. Sol sebepti Memlekettik qyzmet ister jónindegi agenttik pen Prezident Ákimshiligi bul máselemen ainalysýy kerek», - dedi Memleket basshysy.
