Qasym-Jomart Toqaev Afrika Odaǵy men Eýropa Odaǵynyń birlesken tóraǵalyǵymen ótken Azyq-túlik qaýipsizdigi jónindegi jahandyq sammitke qatysty, dep habarlaidy "Ult aqparat" Aqordanyń baspasóz qyzmetine silteme jasap.
Jiynǵa Eýropalyq Keńestiń prezidenti Sharl Mishel, Ispaniia Premer-ministri Pedro Sanches, Kanada Premer-ministri Djastin Triýdo, Senegal Prezidenti Maki Sall, AQSh Memlekettik hatshysy Entoni Blinken jáne basqa da álemdik saiasatkerler qatysty.
Memleket basshysy búginde azyq-túlik qaýipsizdigin qamtamasyz etý álemdegi eń ózekti máselelerdiń biri ekenin atap ótti. Sondai-aq 2019 jyly osy formatta ótken sońǵy kezdesýden beri azyq-túlik tapshylyǵyna tap bolǵan adamdardyń sany 135 millionnan 345 million adamǵa deiin óskenine nazar aýdardy.
Qasym-Jomart Toqaev jahandyq azyq-túlik tapshylyǵymen kúresý úshin Qazaqstan aldaǵy ýaqytta óziniń aýyl sharýashylyǵy áleýetin paidalanýǵa nietti ekenin málimdedi.
Atap aitqanda, Prezident bizdiń elimiz astyq pen azyq-túliktiń basqa da negizgi túrleriniń senimdi jetkizýshisi bolyp qala beretinin aitty.
Memleket basshysy ashtyqqa qarsy is-áreket jónindegi kúsh-jigerdi jandandyrýǵa shaqyrdy. Osy rette, Prezident Azyq-túlik qaýipsizdigi jónindegi islam uiymymen jáne óńirdegi BUU institýttarymen túrli satyp alý jobalary, sonyń ishinde Aýǵanstan qajettilikteri úshin yntymaqtastyqty keńeitýge daiyn ekenin jetkizdi.
Prezident Qara teńiz astyq bastamasyn júzege asyrýdy jaqtap, azyq-túlik pen tyńaitqyshtardy barlyq sanktsiialar men shekteýlerden bosatýdyń, olardy kedei elderge jetkizýdi qamtamasyz etýdiń mańyzdy ekenin atap ótti.
Qasym-Jomart Toqaev elimizdiń tranzittik-kólik múmkindikterine, sonyń ishinde Transkaspii halyqaralyq kólik dáliziniń áleýetine toqtaldy.
– Aldaǵy jyldary Qazaqstan arqyly júk tasymaldaý kólemi aitarlyqtai artady dep boljap otyrmyz. Qysqa qarai Qazaqstan energiia resýrstary men asa mańyzdy shikizat taýarlarynyń tapshylyǵyn azaita alady, – dedi Memleket basshysy.
Prezident klimattyń ózgerýine jáne azyq-túlik júieleriniń qurylymdyq turǵyda álsizdigine bailanysty syn-qaterlerge de toqtaldy. Sondai-aq Qazaqstan halyqaralyq tranzittik hab retinde jahandyq jáne turaqty jetkizý tizbegin qurýǵa qabiletti ekenin aitty.
Qasym-Jomart Toqaev sózin qorytyndylai kele, ótken ǵasyrdyń otyzynshy jyldaryndaǵy náýbet kezinde Qazaqstan ashtyq qasiretin bastan keshkenin, sondyqtan azyq-túlik problemalaryn sheshýge tolyq múddeli ekenin aitty.
