Aýyl ákimderin sailaý biyl tamyz-jeltoqsan aralyǵynda ótedi. Bul týraly Ulttyq qoǵamdyq senim keńesiniń besinshi otyrysynda QR Prezidenti Qasym-Jomart Toqaev málim etti, dep habarlaidy "Ult aqparat".
«Taǵy bir mańyzdy másele – ózin-ózi basqarý tájiribesin damytý jáne jergilikti deńgeidegi sailaý institýtyn nyǵaitý. Aýylda, aýdanda turatyn árbir jan óziniń jáne otbasynyń bolashaǵyna ózi jaýapty ekenin sezinýge tiis. Olardyń pikiri barynsha eskerilýi kerek. Men byltyrǵy Joldaýymda Úkimetke Jergilikti ózin-ózi basqarýdy damytýdyń jańa tujyrymdamasyn ázirleýdi tapsyrdym. Tiisti jumystar atqarylýda. Bul qujattyń jobasyn Reformalar jónindegi joǵary keńes aldaǵy ýaqytta qaraityn bolady. Al, ekinshi jartyjyldyqta máseleni keiinge ysyrmai, tiisti zań jobasyn daiyndaýǵa kirisý kerek», - dedi Memleket basshysy.
Prezidenttiń aitýynsha, strategiialyq mańyzy bar osy qujattarda búgingi ahýaldyń erekshelikteri eskerilýi tiis.
«Qazir biz kentterdiń, aýyldar men aýyldyq okrýgterdiń ákimderin tikelei sailaýǵa daiyndalyp jatyrmyz. Sailaý biyl shamamen tamyz-jeltoqsan ailary arasynda ótedi. Osy jyly 786 aýyl ákiminiń ókilettigi aiaqtalady. Iaǵni, 800 jýyq eldi mekendi qamtityn jergilikti sailaý naýqany ótedi. Bul elimizdiń qoǵamdyq-saiasi ómirindegi eleýli oqiǵa bolmaq», - dedi Toqaev.
Budan buryn habarlanǵandai, Prezident aýdan ákimderiniń tikelei sailaý 2024 jyly ótkizý kerek dep sanaitynyn aitty.
«Kelesi mańyzdy qadam – aýdan ákimderiniń tikelei sailaýy. Men bul sailaýdy 2024 jyly ótkizý kerek dep sanaimyn. Osy bastama elimizdi demokratiialandyrýǵa jáne jergilikti basqarý institýtyn nyǵaitýǵa eleýli úles qosady dep senemin», - dedi Memleket basshysy.
