Foto: Aleksandr Pavskii/ Kazinform
Memleket basshysy Qasym-Jomart Toqaev Almaty áýejaiynda adamdy kepilge alý jaǵdaiy jóninde habardar. Bul týraly Aqorda málim etti.
— Prezident qylmyskerdiń sýyq qarýyn tartyp alyp, ustaýǵa kómektesken er adamnyń batyldyǵyn erekshe atap ótip, atalǵan azamatty memlekettik nagradaǵa usynýdy tapsyrdy, — delingen habarlamada.
Eske sala keteiik, búgin Almaty halyqaralyq áýejaiynda 11:45–te keleńsiz oqiǵa boldy. Ishki reister terminalynda er adam jolaýshy retinde ushý aldyndaǵy tekserý aimaǵyna barǵan. Aviatsiialyq qaýipsizdik qyzmetkerleri er adamnan qujattardy kórsetýdi suraǵan, al ol áýejai qyzmetkerin shashynan ustap, pyshaqpen qorqytqan edi.
