Foto: Aqordanyń baspasóz qyzmeti
Qasym-Jomart Toqaev Batys Qazaqstanǵa jumys sapary barysynda óńirdegi eń úlken «Atameken» mádeniet saraiyna bardy, dep habarlaidy "Ult aqparat" Aqordaǵa silteme jasap.
Óner ordasy 920 adamǵa arnalǵan. Prezident munda óńirdiń tarihi-shyǵarmashylyq muralaryna arnalǵan kórmeni tamashalady.
Budan keiin Memleket basshysy mádeniet saraiynyń májilis zalynda aimaqqa eńbegi sińgen azamattarmen kezdesti. Olardyń arasynda óńirdiń damýyna úles qosyp júrgen sala mamandary men oqys oqiǵalar kezinde belsendilik tanytyp, azamattyq úlgi kórsetken kisiler de bar.
Prezident óńir belsendilerimen pikir almasty. Ol búgin aimaqtyń tynys-tirshiligimen tanysyp júrgenin aitty. Sondai-aq Memleket basshysy Batys Qazaqstandy elimizdiń damýy úshin mańyzdy aimaq dep atap ótti.
– Oblystyń áleýeti zor. Elimizde aýqymdy jumystar atqarylyp jatyr. Osyndai kezeńde biz úshin eń qundy nárse – beibitshilik, ózara túsinistik. Osy jolda bárimiz bir el bolyp eńbek etsek, eshqandai kedergi bolmaidy. Birligimiz bekem bolsa, tosqaýyldyń bárin eńseremiz, – dedi Qasym-Jomart Toqaev.
Memleket basshysy kezdesýge qatysqan ǵalymdarǵa, jastarǵa, eńbek adamdaryna qoldaý kórsetiletinin jetkizdi. Sonymen qatar Prezidenttik jastar kadrlyq rezervi áleýmettik lift retinde jumys istei bastaǵanyn atap ótti.
