فوتو: اقوردانىڭ باسپاسٶز قىزمەتٸ
قاسىم-جومارت توقاەۆ باتىس قازاقستانعا جۇمىس ساپارى بارىسىندا ٶڭٸردەگٸ ەڭ ٷلكەن «اتامەكەن» مەدەنيەت سارايىنا باردى, دەپ حابارلايدى "ۇلت اقپارات" اقورداعا سٸلتەمە جاساپ.
ٶنەر ورداسى 920 ادامعا ارنالعان. پرەزيدەنت مۇندا ٶڭٸردٸڭ تاريحي-شىعارماشىلىق مۇرالارىنا ارنالعان كٶرمەنٸ تاماشالادى.
بۇدان كەيٸن مەملەكەت باسشىسى مەدەنيەت سارايىنىڭ مەجٸلٸس زالىندا ايماققا ەڭبەگٸ سٸڭگەن ازاماتتارمەن كەزدەستٸ. ولاردىڭ اراسىندا ٶڭٸردٸڭ دامۋىنا ٷلەس قوسىپ جٷرگەن سالا ماماندارى مەن وقىس وقيعالار كەزٸندە بەلسەندٸلٸك تانىتىپ, ازاماتتىق ٷلگٸ كٶرسەتكەن كٸسٸلەر دە بار.
پرەزيدەنت ٶڭٸر بەلسەندٸلەرٸمەن پٸكٸر الماستى. ول بٷگٸن ايماقتىڭ تىنىس-تٸرشٸلٸگٸمەن تانىسىپ جٷرگەنٸن ايتتى. سونداي-اق مەملەكەت باسشىسى باتىس قازاقستاندى ەلٸمٸزدٸڭ دامۋى ٷشٸن ماڭىزدى ايماق دەپ اتاپ ٶتتٸ.
– وبلىستىڭ ەلەۋەتٸ زور. ەلٸمٸزدە اۋقىمدى جۇمىستار اتقارىلىپ جاتىر. وسىنداي كەزەڭدە بٸز ٷشٸن ەڭ قۇندى نەرسە – بەيبٸتشٸلٸك, ٶزارا تٷسٸنٸستٸك. وسى جولدا بەرٸمٸز بٸر ەل بولىپ ەڭبەك ەتسەك, ەشقانداي كەدەرگٸ بولمايدى. بٸرلٸگٸمٸز بەكەم بولسا, توسقاۋىلدىڭ بەرٸن ەڭسەرەمٸز, – دەدٸ قاسىم-جومارت توقاەۆ.
مەملەكەت باسشىسى كەزدەسۋگە قاتىسقان عالىمدارعا, جاستارعا, ەڭبەك ادامدارىنا قولداۋ كٶرسەتٸلەتٸنٸن جەتكٸزدٸ. سونىمەن قاتار پرەزيدەنتتٸك جاستار كادرلىق رەزەرۆٸ ەلەۋمەتتٸك ليفت رەتٸندە جۇمىس ٸستەي باستاعانىن اتاپ ٶتتٸ.
