Prezident Qasym-Jomart Toqaev «Astana» halyqaralyq qarjy ortalyǵy (AHQO) Sotynyń jańadan taǵaiyndalǵan Tóraǵasy Lord Manstyń resmi ant berý rásimine onlain formatta qatysty, dep habarlaidy "Ult aqparat" Aqordaǵa silteme jasap.
Memleket basshysy óz sózinde, Qazaqstan halyqaralyq standarttarǵa sai keletin zamanaýi, kásibi jáne táýelsiz sot júiesin qalyptastyrýǵa erekshe kóńil bóletinin atap ótti. Osy oraida Tuńǵysh Prezident – Elbasy Nursultan Nazarbaevtyń bastamasymen «Astana» halyqaralyq qarjy ortalyǵynyń Sotyn qurý arqyly elimiz sot júiesindegi qurylymdyq reformalarǵa beiildi ekenin taǵy bir márte anyq aiqyndap otyr.
– «Astana» halyqaralyq qarjy ortalyǵynyń Soty Qazaqstanda jumys istep jatqan nemese elimizge kelýdi josparlap otyrǵan investorlarǵa álemdegi barlyq iri qarjy ortalyqtaryndaǵydai laiyqty sottarmen, sot protsessterimen, tájiribesimen jáne standarttarymen jumys isteýge múmkindik beredi. Jalpy quqyq boiynsha tájiribeli sottar ózderiniń beitaraptylyǵymen, ádildigimen jáne barmaq basty, kóz qystyǵa kónbeitindigimen tanymal. Sondai-aq olar sot júiesiniń turaqtylyǵy men quqyq buzylmaýynyń kepili, – dedi Prezident.
Qasym-Jomart Toqaevtyń pikirinshe, pandemiia men munai baǵasynyń quldyraýynan týyndaǵan qazirgidei daǵdarys kezinde el ekonomikasyn qaita qalpyna keltirý jumysynda, investitsiia tartý barysynda «Astana» halyqaralyq qarjy ortalyǵynyń mańyzy arta túsken.
– AHQO senimdi qarjylyq platforma uǵymynyń sinonimine ainalyp, sheteldik investorlardyń Qazaqstanǵa degen senimin arttyrýy kerek. Óz kezeginde «Astana» halyqaralyq qarjy ortalyǵynyń mańyzdy bóligi retinde Qarjy ortalyǵynyń táýelsiz sot júiesiniń jalpy quqyq boiynsha Sotyna AHQO-nyń qyzmetinde erekshe ról atqarady. Soǵan sáikes Qazaqstannyń investitsiialyq baǵdarlamasynyń tiimdi júzege asýyna atsalysady, – dedi Memleket basshysy.
Shara sońynda Qazaqstan Prezidenti Lord Výlfke Qarjy ortalyǵynyń sot júiesin qurý barysynda sińirgen eńbegi úshin alǵys aityp, Lord Mansqa AHQO Sotynyń Tóraǵasy retindegi jumysyna tabys tiledi.
