Foto:Aqordanyń baspasóz qyzmeti
Memleket basshysy Qasym-Jomart Toqaev Anar Borashevany álemdegi eń biik Everest shyńyn qazaq qyzdarynyń arasynan birinshi bolyp baǵyndyrýymen quttyqtady, -dep habarlaidy "Ult Aqparat" Aqordanyń baspasóz qyzmetine silteme jasap.
Prezident onyń osynaý aitýly jetistigi jastardy sportpen shuǵyldanýǵa jigerlendirgenin aitty. Memleket basshysy sporttyń mundai qiyn ári qaýipti túrimen ainalysý úshin asqan erik-jiger, tózimdilik, sondai-aq psihologiialyq jáne fizikalyq daiyndyq kerek ekenine nazar aýdardy.
Anar Borasheva taýǵa órmeleýmen 2015 jyldan beri ainalysyp kele jatqanyn, al alpinizmniń qyr-syryn kásibi túrde sońǵy 4 jyl ishinde meńgergenin aitty. Everestke deiin ol kóptegen shyńdy baǵyndyryp úlgergen. Onyń ishinde Alpi taýlaryndaǵy Monblan shyńy men Afrikadaǵy eń biik Kilimandjaro taýy bar.
Áńgimelesý barysynda alpinist aldaǵy ýaqytta álemdegi eń biik jeti shyńdy baǵyndyrýdy josparlap otyrǵanyn jetkizdi. Sondai-aq ol Memleket basshysyna Everest shyńyna alyp shyqqan Qazaqstan týyn syiǵa tartty.
Qasym-Jomart Toqaev otandyq sportshylar ártúrli halyqaralyq dodalarda el namysyn laiyqty deńgeide qorǵap júrgenin atap ótip, Anar Borashevanyń aldaǵy ýaqytta jańa biikterdi baǵyndyra berýine tilektestik bildirdi.
