Prezident Almaty qalasyna jumys sapary aiasynda 1970 jyly ózi bitirgen Iliias Esenberlin atyndaǵy №25 mektep-gimnaziiasyna bardy, dep habarlaidy "Ult aqparat" Aqordaǵa silteme jasap.
Memleket basshysy zamanaýi interaktivti oqý quraldarymen jabdyqtalǵan kabinetterdi, akt zaly men mektep kitaphanasyn aralap kórdi.
Qasym-Jomart Toqaev kezinde ózi oqyǵan synypqa kirdi. Qazirgi ýaqytta bul kabinette frantsýz tili oqytylady.
Budan bólek Memleket basshysy mektep tarihyna arnalǵan mýzeidiń ekspozitsiiasymen tanysty. Onda oqý ordasynyń ótkeni týraly túrli arhiv qujattary, belgili túlekterdiń ómirbaiandary men fotosýretteri jinaqtalǵan.
Sodan keiin Prezident mektep kitaphanasyndaǵy Qurmetti qonaqtar kitabyna qoltańba qaldyrdy.
Qasym-Jomart Toqaevqa 1970 jyly 10 «V» synybynyń atynan ózi jazǵan hat kórsetildi. Bul hat ýaqyt kapsýlasyna salynyp, mektep qabyrǵasyna qalanǵan eken.
«Bizdiń atqarǵan isimiz az emes, degenmen áli de jumys kóp. Biz 10-synypty jaqsy bitirýge ýáde beremiz. Institýtqa túsý emtihandaryn jaqsy tapsyrýǵa ýáde beremiz. Al ony bitirgen soń jumys isteimiz. 2017 jyly 64-65 jasqa tolǵan kezimizde sizderdiń kózderińizge tik qaraýǵa uialmaityndai bolyp kelýge ýáde beremiz», – dep jazylǵan hatta.
Dástúrdi jalǵastyrǵan 11-synyp oqýshylary Memleket basshysymen birge 2050 jylǵa arnalǵan hatty ýaqyt kapsýlasyna salyp, mektep qabyrǵasyna qoidy.
