پرەزيدەنت الماتى قالاسىنا جۇمىس ساپارى اياسىندا 1970 جىلى ٶزٸ بٸتٸرگەن ٸليياس ەسەنبەرلين اتىنداعى №25 مەكتەپ-گيمنازيياسىنا باردى, دەپ حابارلايدى "ۇلت اقپارات" اقورداعا سٸلتەمە جاساپ.
مەملەكەت باسشىسى زاماناۋي ينتەراكتيۆتٸ وقۋ قۇرالدارىمەن جابدىقتالعان كابينەتتەردٸ, اكت زالى مەن مەكتەپ كٸتاپحاناسىن ارالاپ كٶردٸ.
قاسىم-جومارت توقاەۆ كەزٸندە ٶزٸ وقىعان سىنىپقا كٸردٸ. قازٸرگٸ ۋاقىتتا بۇل كابينەتتە فرانتسۋز تٸلٸ وقىتىلادى.
بۇدان بٶلەك مەملەكەت باسشىسى مەكتەپ تاريحىنا ارنالعان مۋزەيدٸڭ ەكسپوزيتسيياسىمەن تانىستى. وندا وقۋ ورداسىنىڭ ٶتكەنٸ تۋرالى تٷرلٸ ارحيۆ قۇجاتتارى, بەلگٸلٸ تٷلەكتەردٸڭ ٶمٸرباياندارى مەن فوتوسۋرەتتەرٸ جيناقتالعان.
سودان كەيٸن پرەزيدەنت مەكتەپ كٸتاپحاناسىنداعى قۇرمەتتٸ قوناقتار كٸتابىنا قولتاڭبا قالدىردى.
قاسىم-جومارت توقاەۆقا 1970 جىلى 10 «ۆ» سىنىبىنىڭ اتىنان ٶزٸ جازعان حات كٶرسەتٸلدٸ. بۇل حات ۋاقىت كاپسۋلاسىنا سالىنىپ, مەكتەپ قابىرعاسىنا قالانعان ەكەن.
«بٸزدٸڭ اتقارعان ٸسٸمٸز از ەمەس, دەگەنمەن ەلٸ دە جۇمىس كٶپ. بٸز 10-سىنىپتى جاقسى بٸتٸرۋگە ۋەدە بەرەمٸز. ينستيتۋتقا تٷسۋ ەمتيحاندارىن جاقسى تاپسىرۋعا ۋەدە بەرەمٸز. ال ونى بٸتٸرگەن سوڭ جۇمىس ٸستەيمٸز. 2017 جىلى 64-65 جاسقا تولعان كەزٸمٸزدە سٸزدەردٸڭ كٶزدەرٸڭٸزگە تٸك قاراۋعا ۇيالمايتىنداي بولىپ كەلۋگە ۋەدە بەرەمٸز», – دەپ جازىلعان حاتتا.
دەستٷردٸ جالعاستىرعان 11-سىنىپ وقۋشىلارى مەملەكەت باسشىسىمەن بٸرگە 2050 جىلعا ارنالعان حاتتى ۋاقىت كاپسۋلاسىنا سالىپ, مەكتەپ قابىرعاسىنا قويدى.
