Áleýmettik jelide Qazaqstannyń sý resýrstary men sý sharýashylyǵy nysandary izraildik kompaniianyń basqarýyna beriledi degen aqparat tarady. Sý resýrstary jáne irrigatsiia ministrligi bul málimetti joqqa shyǵardy, dep habarlaidy ult.kz.
Áleýmettik jelide myńdaǵan oqyrmany bar, ózin memlekettik baǵdarlamalardy súiemeldeýshi retinde tanystyrǵan Gúlnara Muhtar osy máselege qatysty video jariialady. Onyń aitýynsha, oqyrmandary Qazaqstannyń sý resýrstary Izraildiń basqarýyna beriledi degen aqparatty jiberip, mán-jaidy túsindirýdi suraǵan.
Beinejazbada ol Qazaqstan men Izrail arasynda sý salasyndaǵy yntymaqtastyq bar ekenin aityp, ministrliktiń málimdemesine qatysty pikir bildirdi.
«Biraq bizdiń Izrailmen seriktestigimiz bar. Ministrlik jalǵan dep málimdeme jasapty. Ministrlik sýdy únemdeý boiynsha memorandýmǵa qol qoiǵan. Halyqqa ashyq túsindirý kerek shyǵar», – dedi Gúlnara Muhtar.
Buǵan Sý resýrstary jáne irrigatsiia ministrligi videonyń astyna pikir qaldyryp, taraǵan aqparattyń shyndyqqa sáikes kelmeitinin málimdedi.
«Qazaqstannyń sý resýrstary men sý sharýashylyǵy nysandaryn sheteldik kompaniianyń basqarýyna berý týraly tarap jatqan aqparat shyndyqqa sáikes kelmeidi. Sheteldik tájiribeni tartý Qazaqstannyń sý resýrstaryna menshik quqyǵyn nemese olardy basqarý ókilettigin sheteldik kompaniialarǵa berýdi kózdemeidi», – delingen ministrlik habarlamasynda.
Vedomstvonyń túsindirýinshe, sý salasyndaǵy halyqaralyq yntymaqtastyq zamanaýi tehnologiialardy engizýge, sý shyǵynyn azaitýǵa jáne sý sharýashylyǵy infraqurylymynyń tiimdiligin arttyrýǵa baǵyttalǵan.
Osylaisha, ministrlik sheteldik kompaniialarmen áriptestik ornatý Qazaqstannyń sý resýrstary men sý sharýashylyǵy nysandaryn olardyń basqarýyna berý degendi bildirmeitinin atap ótti.
