Foto: Aqorda
Memleket basshysy Qasym-Jomart Toqaev Aqmola oblysynyń ákimi Marat Ahmetjanovty qabyldady. Kezdesýde óńirdiń biylǵy birinshi jartyjyldyqtaǵy áleýmettik-ekonomikalyq damýy jáne aldaǵy josparlary talqylandy, dep habarlaidy Ult.kz.
Ákimniń málimetinshe, oblysta negizgi kórsetkishterdiń barlyǵynda ósim bar.
Aýyl sharýashylyǵy salasynda óńir ónim kólemin 1,2 trln teńgege jetkizýdi kózdep otyr. Maily daqyldar alqaby 2,5 ese artqan.
Investitsiialyq jobalar aiasynda Arshaly aýdanynda respýblikalyq mańyzy bar Aqmola indýstriialyq aimaǵy quryldy. Jalpy quny 4 mlrd dollardan asatyn jobalar portfeli jasaqtalyp, 10 myńǵa jýyq jumys orny ashylady.
Áleýmettik salada sońǵy eki jylda 4,7 myń otbasy baspanaly boldy. Bul – aldyńǵy jeti jyldaǵy kórsetkishke teń. Halyqtyń áleýmettik osal tobyna beriletin turǵyn úi kezegi 29%-ǵa qysqarǵan. Qosshy qalasynda úleskerlerdiń máselesi sheshilýde.
Bilim berý baǵytynda sońǵy eki jylda 33 jańa nysan salynyp, 21 myń oqýshy orynmen qamtyldy. Jańa oqý jyly qarsańynda apatty jáne úsh aýysymdy mektepter máselesi tolyq joiyldy.
Kommýnaldyq sharýashylyqta jylytý maýsymyna daiyndyq josparǵa sai júrip jatyr. Kókshetaýda qýaty 240 MVt bolatyn jylý elektr ortalyǵynyń qurylysy bastaldy. Sý tazartý nysandary paidalanýǵa berilse, oblys ortalyǵyndaǵy 200 myń turǵyn sapaly aýyz sýmen qamtylady. Jyl sońyna deiin 9 eldi mekenge gaz tartylady.
Prezident óńirdiń áleýmettik osal topty turǵyn úimen qamtý tájiribesin erekshe atap ótti. Sonymen qatar, egin jinaýdy uiymdastyrý, Qosshy qalasynyń damýy, sý tasqynynyń aldyn alý jáne investitsiia tartý jóninde naqty tapsyrma berdi.
