QR Prezidenti Ákimshiligi qoǵamdyq qabyldaýynyń Telegram-daǵy paraqshasynda qandai sanattaǵy azamattar jeńildikpen baspana ala alatyndyǵyn túsindirdi, dep habarlaidy "Ult aqparat".
«Belgili bir sanattaǵy azamattarǵa jeńildikpen baspana berý búgingi kúni Qazaqstandaǵy eń ózekti máselelerdiń biri bolyp tur. Osyǵan qarai Ótinishterdi baqylaý bólimi «Nurly jer» turǵyn úi baǵdaralmasynyń 2020-2025 jyldarǵa uzartylǵandyǵyn habarlaidy. «Biryńǵai turǵyn úi saiasatyn júzege asyrý» birinshi mindeti aiasynda baspana qoljetimdiligi satysy engizilip, onda aiqyndýshy faktor halyqtyń kirisi bolady», - delingen taratylǵan aqparatta.
Ótinishterdi baqylaý bóliminiń málimetinshe, otbasy múshesine bir kúnkóris minimýmyna (29,7 myń teńge) deiin tabysy bar kezekte turǵan azamattarǵa (jetim balalarǵa, 1, 2-toptaǵy múgedekterge, zeinetkerlerge jáne basqalaryna) satyp alýǵa bolmaityn jaldamaly baspana beriledi.
«Baqytty otbasy» baǵdarlamasy arqyly otbasy múshesine eki kúnkóris minimýmyna (59,4 myń teńge) deiin tabysy bar azamattar (kópbalaly, tolyq emes jáne múgedek balalary bar otbasylar) páter alýyna múmkindigi bar.
Otbasy múshesine 3,1 kúnkóris minimýmyna (92 myń teńge) deiin tabysy bar kezekte turǵandar (áskeri qyzmetshiler, biýdjet jáne memlekettik qyzmetkerler) «5-20-25» baǵdarlamasymen ákimdikterdiń kredittik baspanasyna úmitker bola alady. Tabysy 3,1 kúnkóris minimýmynan joǵary azamattar «7-20-25» baǵdarlamasyna qatysa alady.
Al tabysy 5 kúnkóris minimýmynan (148,5 myń teńge) joǵary azamattar «Baspana-hit», «Orda» QIK, Turǵynúiqurylysjinaqbankiniń «Óz úiim» naryqtyq ónimderi arqyly bastapqy jáne qaitalama páter satyp alýyna múmkindik jasalǵan.
«Baspana alý ashyqtyǵyn qamtamasyz etý jáne biryńǵai júieli esepke alý úshin Turǵyn úi kezeginde turǵandardyń biryńǵai respýblikalyq bazasy engiziledi. Atalǵan baza kezekke turǵandarǵa baspananyń qoljetimdiligin aiqyndaý úshin qoldanylady. Bul memlekettik qoldaýdyń ataýlyǵyn jáne memleket qarajatyn kádege jaratý tiimdiligin qamtamasyz etedi», - dep atap ótedi QR Prezidenti Ákimshiliginiń qoǵamdyq qabyldaýy.
