QR Prezidenti Ákimshiligi qoǵamdyq qabyldaýynyń Telegram paraqshasy 2020 jyldyń 1 qańtarynan bastap qoldanysqa engizilgen áleýmettik saladaǵy keibir ózgeristerdi túsindirdi, dep habarlaidy "Ult aqparat".
Atap aitqanda, «Altyn alqa», «Kúmis alqa» nagradalarynyń laýerattaryna, «Batyr ana» ataǵyn alǵandarǵa, I, II-dárejeli «Ana dańqy» ordenimen marapattalǵan kópbalaly analarǵa tólenetin aisaiynǵy memlekettik járdemaqynyń kólemi tabysqa qaramastan 16 973 teńgeni quraidy. Múgedek balany kámelet jasyna tolǵanǵa deiin tárbieleitin anaǵa nemese ákege, asyrap alýshyǵa taǵaiyndalatyn jáne tólenetin járdemaqy kólemi 43 657 teńge bolady. Dál osyndai mólsherdegi járdemaqy bala kezinen birinshi toptaǵy múgedekti baǵyp-qaǵý úshin tólenedi.
Sonymen qatar jumys isteý qabiletin joǵaltqandarǵa, asyraýshysynan aiyrylǵandarǵa jáne jumystan shyǵyp qalǵandarǵa áleýmettik tólem taǵaiyndaý barynda qoldanylatyn parametrler de ózgeriske ushyrap, tólem ortasha eseppen 30 paiyzǵa kóbeidi. Jumysynan airylǵan, biraq oǵan deiin 100 myń teńge kóleminde ortasha tabysy bolǵan jáne áleýmettik saqtandyrý júiesine qatysý ótili 5 jyldan asatyn adamdar úshin tólem somasy 30 myńnan 41 600 teńgege deiin ulǵaidy.
«4 jáne odan da kóp kámeletke tolmaǵan balasy nemese 23 jasqa deiingi kúndizgi bólimde oqityn stýdentteri bar otbasyǵa jańa memlekettik járdemaqy bólinedi. Ol otbasynyń kirisine qaramastan saralanǵan mynadai kólemde beriledi: 4 balaǵa - 42 496 teńge, 5 balaǵa - 53 127 teńge, 6 balaǵa – 63 757 teńge, 7 jáne odan da kóp balaǵa 74 388 teńge», - delingen taratylǵan aqparatta.
Sonymen qatar 2020 jyldyń 1 qańtarynan stýdentterdiń shákirtaqysy 25 paiyzǵa ósti. Atap aitqanda, bakalavriat stýdentteriniń shákirtaqysy endi - 26 186 teńge, magistranttardiki - 66 913 teńge, doktoranttardiki - 102 498 teńge boldy.
