Memleket basshysy Almaty qalasyna jumys sapary barysynda aǵartýshy, ult ustazy Ahmet Baitursynulynyń mýzei-úiine bardy, dep habarlaidy Aqordanyń baspasóz qyzmeti.
Prezident aldymen mýzeidiń «Ulttyq rýhtyń uly tini», «Qazaq sanasynyń shamshyraǵy» jáne «A.Baitursynulynyń jumys kabineti» zaldaryndaǵy jádigerlermen tanysty. Munda uly tulǵanyń ómiri men shyǵarmashylyǵy týraly 500-ge jýyq eksponat jinaqtalǵan.
Ahmet Baitursynuly bul úide qyzy Sholpannyń otbasymen birge 1934-1937 jyldary turǵan. Mýzei-úii 1998 jyly Alash qairatkeriniń 125 jyldyq mereitoiynda saltanatty túrde ashyldy.
Sodan keiin Qasym-Jomart Toqaev Ahmet Baitursynulyna arnalǵan eskertkishti ashty. Is-sharaǵa aqynnyń týystary men ziialy qaýym ókilderi qatysty. Memleket basshysy eskertkishtiń ashylý rásimine jinalǵandar aldynda sóz sóilep, tulǵanyń ult tarihyndaǵy róli joǵary ekenin aitty.
«Jurtyna paidasy tietin jumystyń bárine Ahań úles qosqan. Tipti, birqatar salany ózi bastap bergen. Ol qazaqtyń tól álipbiin jasady, alǵashqy álippemizdi qurastyrdy. Sondai-aq oqýlyq jazyp, til biliminiń negizin qalady. «Qazaq» gazetin shyǵaryp, baspasózdiń damýyna jol ashty. Arada qansha jyl ótse de, onyń rýhani murasy jurtynyń igiligine jarap keledi. Sol sebepti jurtymyz ony «Ult ustazy» dep ardaqtaidy. Ahmet Baitursynuly – aǵartýshy-ǵalym retinde búkil órkenietti álemge tanymal. Ol halqymyzdyń taǵdyry synǵa túsken kúrdeli kezeńde erekshe ultjandylyq tanytty. Elimiz bútin, jerimiz tutas bolýy úshin ólsheýsiz eńbek sińirdi. Qazaqqa qyzmet etý jolynda bar kúsh-jigerin jumsady. Ult kóshbasshysynyń ómir jolyn eldi súiýdiń jarqyn úlgisi deýge bolady. Onyń ǵibratty ǵumyry – óskeleń urpaq úshin árdaiym ónege», – dedi Memleket basshysy.
Prezident Alash arysynyń týǵan jeri Torǵai óńirinde dúbirli toi ótkenin, IýNESKO, TÚRKSOI uiymdary aiasynda alqaly jiyndar uiymdastyrylǵanyn atap ótti. Ahmet Baitursynulynyń 12 tomdyq shyǵarmalar jinaǵy basyp shyǵarylyp, tańdamaly eńbekteri 4 tilde jaryq kórdi.
«Qostanai qalasyndaǵy áýejaiǵa Ahmet Baitursynulynyń esimi berildi. Torǵaida Mirjaqyp Dýlatuly ekeýine eskertkish ornatylyp, qos alyptyń ádebi mýzeii tolyq jańǵyrtyldy. Byltyr osy Almatydaǵy murajaiy memleket menshigine qaitaryp alynǵanyn bilesizder. Endi, mine, qala tórinde sáýletti eskertkishi boi kóterdi. Osynyń bári – halqymyzdyń ult ustazyna degen erekshe qurmetiniń belgisi. Kezinde Muhtar Áýezov «Ahańnyń qazaq balasyna istegen eńbegin, óner, bilim, saiasat jolyndaǵy qajymaǵan qairatyn biz umytsaq ta, tarih umytpaidy» degen bolatyn. Ahmet Baitursynulynyń urpaqqa amanat etken mol murasy – qazaqtyń baǵa jetpes asyl qazynasy. Búginde Ahmettaný ǵylymyna bet buryp, ǵalymnyń shyǵarmashylyǵyn zerttep júrgen jastardyń qatary kóbeiip keledi. Bul – uly tulǵanyń ulaǵatty joly eshqashan úzilmeidi degen sóz», – dedi Qasym-Jomart Toqaev.
Memleket basshysy saltanatty rásimnen keiin aqynnyń urpaqtarymen, ziialy qaýym ókilderimen, sondai-aq eskertkish avtorlary Aidos Búrkitbaevpen jáne Timýr Ermuhametovpen áńgimelesip, sýretke tústi.
