Memleket basshysy Qasym-Jomart Toqaev «Qazaqstan Respýblikasynda tekserýlerge jáne profilaktikalyq baqylaý men qadaǵalaýdy baryp júrgizýge moratorii engizý týraly» Jarlyqqa qol qoidy, dep habarlaidy Aqorda. "Ult aqparat" qujattyń tolyq mátinin jariialaidy.
***
Qazaqstan Respýblikasynda tekserýlerge jáne profilaktikalyq baqylaý men qadaǵalaýdy baryp júrgizýge moratorii engizý týraly
Qazaqstan Respýblikasynda shaǵyn kásipkerlikti, onyń ishinde mikrokásipkerlikti damytý úshin jaǵdaidy jaqsartý maqsatynda QAÝLY ETEMIN:
1. Ortalyq memlekettik jáne jergilikti atqarýshy organdar 2020 jylǵy 1 qańtardan bastap 2023 jylǵy 1 qańtarǵa deiin shaǵyn kásipkerlik sýbektilerin, onyń ishinde mikrokásipkerlik sýbektilerin tekserýlerdi jáne profilaktikalyq baqylaý men qadaǵalaýdy baryp júrgizýdi toqtatsyn, oǵan mynalar qosylmaidy:
1) halyqtyń ómiri men densaýlyǵyna, qorshaǵan ortaǵa, zańdylyq pen qoǵamdyq tártipke yqtimal túrde jappai qater, konstitýtsiialyq qurylysqa jáne ulttyq qaýipsizdikke týra nemese tikelei qater tóndiretin buzýshylyqtardy boldyrmaýǵa nemese joiýǵa baǵyttalǵan, sondai-aq «Qarjy naryǵy men qarjy uiymdaryn memlekettik retteý, baqylaý jáne qadaǵalaý týraly» 2003 jylǵy 4 shildedegi Qazaqstan Respýblikasynyń Zańynda kózdelgen negizder boiynsha júrgiziletin tekserýler;
2) Qazaqstan Respýblikasynyń zańnamasynda, belgilengen talaptardy buzý faktileriniń týyndaý sebepterin anyqtaý úshin, baqylaý men qadaǵalaýdyń naqty sýbektisine (obektisine) qatysty naqty fakti boiynsha bir jospardan tys tekserý jetkiliksiz jáne osy naqty faktige bailanysty ózge de sýbektilerge qatysty baqylaý men qadaǵalaý talap etiletin jaǵdailarda osy tarmaqtyń 1) tarmaqshasyna sáikes tekserýler;
3) óz qyzmetine qatysty kásipkerlik sýbektileriniń ótinishteri negizinde, onyń ishinde «Ruqsattar jáne habarlamalar týraly» 2014 jylǵy 16 mamyrdaǵy Qazaqstan Respýblikasynyń Zańyna sáikes ruqsat alýǵa arnalǵan ótinish boiynsha tekserýler jáne profilaktikalyq baqylaýdy baryp júrgizý;
4) 2014 jylǵy 4 shildedegi Qazaqstan Respýblikasynyń Qylmystyq-protsestik kodeksinde kózdelgen negizder boiynsha tekserýler;
5) Qazaqstan Respýblikasy Prezidentiniń jáne Qazaqstan Respýblikasy Bas Prokýrorynyń tapsyrmasy boiynsha prokýratýra organdarynyń tekserýleri;
6) kedendik tekserýler;
7) qarsy salyqtyq tekserýler;
8) salyq tóleýshi men onyń debitorlary arasyndaǵy ózara esep aiyrysýdy aiqyndaý, salyq organdarynda tirkeý esebine qoiý, kassa boiynsha shyǵys operatsiialaryn toqtata turý týraly salyq organy shyǵarǵan ókimderdi oryndaý máseleleri boiynsha taqyryptyq salyqtyq tekserýler;
9) halyqtyń sanitariialyq-epidemiologiialyq salamattylyǵy salasynda ónim qaýipsizdiginiń monitoringin júzege asyrý úshin ónimdi irikteý jáne oǵan sanitariialyq-epidemiologiialyq saraptama jasaý maqsatyndaǵy profilaktikalyq qadaǵalaýdy baryp júrgizý;
10) Qazaqstan Respýblikasynyń sáikestikti baǵalaý salasyndaǵy akkreditteý týraly zańnamasynyń saqtalýyn tekserýler jáne profilaktikalyq baqylaýdy baryp júrgizý;
11) jer qoinaýyn paidalanýshylar.
2. Osy Jarlyqtyń 1-tarmaǵynyń 1) jáne 2) tarmaqshalarynda kózdelgen tekserýler ortalyq memlekettik nemese jergilikti atqarýshy organnyń birinshi basshysynyń sheshimi negizinde júrgiziledi dep belgilensin.
3. Osy Jarlyq shaǵyn kásipkerlik sýbektilerin, onyń ishinde mikrokásipkerlik sýbektilerin 2019 jyly bastalǵan tekserýlerge jáne profilaktikalyq baqylaý men qadaǵalaýdy baryp júrgizýge qoldanylmaidy.
4. Qazaqstan Respýblikasynyń Úkimeti osy Jarlyqty iske asyrý jóninde sharalar kabyldasyn.
5. Osy Jarlyqtyń oryndalýyn baqylaý Qazaqstan Respýblikasy Prezidentiniń Ákimshiligine júktelsin.
6. Osy Jarlyq alǵash resmi jariialanǵan kúninen bastap qoldanysqa engiziledi.
Qazaqstan Respýblikasynyń
Prezidenti Q. Toqaev
Nur-Sultan, Aqorda, 2019 jylǵy 26 jeltoqsan
№ 229
