Úkimet basshysy Álihan Smaiylov keshe, 26 qyrkúiekte kóshi-qon máselelerine qatysty ótkizgen jinalystaǵy málimetterge bailanysty qoǵamda durys túsinbei jatqandar baryn aityp, osy máselege qatysty túsinikteme berdi, - dep habarlaidy Massaget.kz portaly.
Smaiylov shetel azamattaryna zań aiasynda qyzmet kórsetiletinin atap ótti.
"Biz halyqaralyq mindetterimizdi oryndai otyryp, óz elimiz ben halqymyzdyń múddesinen joǵary qundylyq joq ekenin umytpaýymyz kerek. Eń mańyzdy máseleniń biri - quqyqtyq tártip pen qaýipsizdik.
Sonymen qatar, arendalyq turǵyn úi baǵalarynyń ósýinen óz azamattymyz qiyn jaǵdaiǵa tap bolyp otyr. Jaýapty organdar turǵyn úi naryǵyndaǵy ahýaldy turaqtandyrý boiynsha tiisti sharalardy qabyldaý qajet. Ony biz keshe aittyq", - dedi Úkimet basshysy.
Premer-ministrdiń sózinshe, eńbekpen qamtý boiynsha eń aldymen qazaqstandyqtardyń jai-kúii, jumys jaǵdaiy prioritet bolýy tiis.
"Barlyq kásiporyn men mekeme osyny esten shyǵarmaý kerek. Al, kórshiles elden kelgen migranttar belgilengen zańnama sheńberinde ǵana eńbek ete alady. Jaǵdai kúndelikti baqylaýda", - dedi Álihan Smaiylov Úkimet otyrysyn bastar aldynda.
Eske salaiyq, 26 qyrkúiekte Premer-ministr Álihan Smaiylov kóshi-qon máseleleri jóninde keńes ótkizgen bolatyn. Onda Resei Federatsiiasynan kelýshiler sanynyń artýyna qatysty qalyptasyp otyrǵan ahýal talqylanǵan. Birneshe ministr qatysqan keńeste Smaiylov ýaqytsha kelgen shetel azamattaryn jumysqa ornalastyrý kezinde eńbek zańnamasynyń saqtalýyna baqylaýdy kúsheitýdi tapsyrǵan edi.
