QR Premer-Ministri Asqar Maminniń tóraǵalyǵymen ótken Úkimet otyrysynda Jumyspen qamtýdyń jol kartasyn iske asyrý barysy qaraldy, dep habarlaidy primeminister.kz saity.
«Biyl daǵdarysqa qarsy qabyldanǵan sharalardy iske asyrý halyqtyń jumyspen qamtylýyn saqtaýǵa yqpal etti. Jumyspen qamtýdyń jol kartasy qazaqstandyqtardyń jumysy men tabysyn saqtaýǵa septigin tigizdi, eleýli áleýmettik-ekonomikalyq tiimdiligin kórsetti.
Jumyspen qamtýdyń jol kartasynyń sheńberinde shamamen 6600 áleýmettik, kommýnaldyq jáne kólik infraqurylymy obektisi salynyp jatyr. Jobalar aiaqtalǵan soń, sabaqtas salalarda 100 myńǵa jýyq jumys orny qurylatyn bolady. Jol kartasynyń jobalaryn iske asyrý úshin qajetti taýarlardyń, jumystar men qyzmetterdiń shamamen 90%-y otandyq óndirýshilerden satyp alyndy. 19 myńǵa jýyq biznes sýbektisi 488 mlrd teńgege tapsyrys aldy, keminde 114 myń jumys orny saqtaldy», - dedi A. Mamin.
Premer-Ministr jumyspen qamtýdy qoldaý sharalaryn iske asyrý qarqyny Atyraý, Shyǵys Qazaqstan, Jambyl, Qyzylorda oblystarynda, Nur-Sultan jáne Shymkent qalalarynda joǵary ekenin atap ótti.
Úkimet basshysy ákimdikterge Jol kartasynyń josparly kórsetkishterine qol jetkizý boiynsha jumysty jandandyrýdy tapsyrdy.
Eńbek ministrligine múddeli memlekettik organdarmen jáne ákimdiktermen birlesip, osy jyldyń sońyna deiin 2021 jylǵa arnalǵan Jumyspen qamtýdyń jol kartasyn jańartý jáne onda turaqty jumys oryndaryn qurýǵa basa mán berý tapsyryldy. Bul rette jobalardyń basym bóligi aiaqtalǵandyqtan, jumysynan bosap qalatyn adamdardy jumyspen qamtý sharalarymen qamtý kerektigi atap ótildi.
Ulttyq ekonomika ministrligine múddeli memlekettik organdarmen jáne ákimdiktermen birlesip, osy jyldyń sońyna deiin barlyq memlekettik baǵdarlamalardyń jumys oryndaryn qurý boiynsha indikatorlaryn jańartý, tiisti statistikalyq esepke alý júiesin engizý, sondai-aq jumys oryndaryn qurýdyń óńirlik kartalaryn ázirlep, bekitý tapsyryldy.
Aita keteiik, jiynda Eńbek jáne halyqty áleýmettik qorǵaý ministri B. Nurymbetov, Shyǵys Qazaqstan oblysynyń ákimi D. Ahmetov jáne Qyzylorda oblysynyń ákimi G. Ábdiqalyqova baiandama jasady.
