Soltústik Qazaqstan oblysyna jumys sapary aiasynda QR Premer-Ministri Álihan Smaiylov óńirdiń áleýmettik-ekonomikalyq damý máseleleri jóninde keńes ótkizdi, dep habarlaidy "Ult aqparat" Úkimettiń baspasóz qyzmetine silteme jasap.
Oblys ákimi Qumar Aqsaqalov, ulttyq ekonomika ministri Álibek Qýantyrov, indýstriia jáne infraqurylymdyq damý ministri Qaiyrbek Óskenbaev, aýyl sharýashylyǵy ministri Erbol Qarashókeev, energetika, qarjy, bilim jáne ǵylym, ekologiia, geologiia jáne tabiǵi resýrstar vitse-ministrleri baiandama jasady.
Baiandamashylardy tyńdaǵan QR Premer-Ministri Memleket basshysynyń tapsyrmasy boiynsha ótken jyldyń mamyr aiynda Soltústik Qazaqstan oblysynyń 2025 jylǵa deiingi áleýmettik-ekonomikalyq damýynyń keshendi jospary qabyldanǵanyn, oǵan 1,8 trln teńge qarastyrylǵanyn atap ótti. Bul jospar birqatar mańyzdy jobalardy iske asyrýǵa, sonyń ishinde jańa ónimder shyǵarýǵa, turaqty jumys oryndaryn qurýǵa, jalpy oblys turǵyndarynyń turmys sapasyn jaqsartýǵa múmkindik beredi.
«Óńir basshylyǵynyń aldynda turǵan negizgi mindetterdiń biri – belgilengen jobalardy ýaqytyly jáne sapaly iske asyrý, sebebi olar áleýmettik-ekonomikalyq damýǵa qosymsha serpin berýi tiis. Osy maqsatqa jetý úshin Úkimet tarapynan barlyq qajetti qoldaý kórsetilip jatyr», — dedi Álihan Smaiylov.
Máselen, 2022 jyly Soltústik Qazaqstan oblysyn damytýǵa 108,6 mlrd teńge somasynda shyǵyndar kózdelgen. Respýblikalyq biýdjetti naqtylaý kezinde qosymsha 72,7 mlrd teńge bólinedi.
«Birinshi kezekte bul shyǵyndar óńirdiń áleýmettik jáne injenerlik infraqurylymyn damytýǵa jumsalýy tiis. Osy baǵytta sapaly nátijelerge qol jetkizý úshin bólingen qarajattyń tiimdi igerilýin qamtamasyz etý qajet», — dedi QR Premer-Ministri.
Keńes barysynda Álihan Smaiylov basqa da birqatar máselege nazar aýdardy.
Álemdegi azyq-túlik taýarlary baǵasynyń kúrt ósýin atap ótken Úkimet basshysy barlyq memlekettik organdar men óńirlerdiń basshylyǵynyń mindeti tiisti sharalardy qabyldap, ishki naryqtaǵy baǵanyń negizsiz ósýine jol bermeý ekenin atap ótti.
«Soltústik Qazaqstan oblysynda jyl basynan beri áleýmettik mańyzy bar azyq-túlik taýarlarynyń baǵasy 12,6%-ǵa ósti. Azyq-túlik tapshylyǵy men baǵa ósimin boldyrmaý úshin qolda bar barlyq tetikterdi tiimdi paidalanǵan jón. Ákimdik baǵa ústemesin baqylaýdy kúsheitýi kerek, ol 15%-dan aspaýy tiis», — dedi QR Premer-Ministri.
Álihan Smaiylov ońtústik óńirlerden jáne Ortalyq Aziiadaǵy kórshi memleketterden erte pisetin kókónisterdi ákelý úshin tikelei sharttar jasasý qajet ekenin aitty.
Sonymen qatar saýda jelileri arqyly «ainalym shemasy» tetigin keńinen paidalaný qajet, al forvardtyq mehanizm arqyly aýyl sharýashylyǵy ónimderin jetkizýge tikelei kelisimder jasasý kerek.
Sondai-aq Premer-Ministr oblysta jalpy quny 320 mlrd teńge bolatyn 37 investitsiialyq jobanyń pýly iske asyrylyp jatqanyn atap ótti. Solardyń arqasynda 4 myńnan astam jańa turaqty jumys orny ashylady.
«Biyl 1 myńnan astam jańa jumys ornyn ashyp, 36,2 mlrd teńgege 19 investitsiialyq jobany júzege asyrý josparlanyp otyr. Oblys ákimdigi barlyq jobalardy josparlanǵan merzimde sapaly iske asyrýdy qamtamasyz etýi qajet», — dep atap ótti QR Úkimetiniń basshysy.
Álihan Smaiylov Indýstriia jáne infraqurylymdyq damý, Qarjy jáne Ulttyq ekonomika ministrlikterine 2022 jylǵy shilde aiynyń aiaǵyna deiin respýblikalyq mańyzy bar «Petropavl – Qorǵan» kúre jolynyń ýchaskesi boiynsha jobalaý-smetalyq qujattamanyń qunyn túzetýdi aiaqtaýdy; 2023 jyldyń sońyna deiin atalǵan ýchaskeni rekonstrýktsiialaý jumystaryn tolyq aiaqtaýdy; osy jyldyń sońyna deiin normativtik jaǵdaidaǵy joldardyń joǵary úlesin qamtamasyz etýdi tapsyrdy.
Keńesti qorytyndylai kele, Premer-Ministr Soltústik Qazaqstan oblysy basshylyǵynyń aldyna barynsha tiimdi sheshýdi qajet etetin aýqymdy jáne jaýapty mindetter qoiylǵanyn atap ótti.
