Premer-Ministr Asqar Mamin ruqsatsyz qoqys tógilgen oryndardyń bárin jabý jóninde pármendi sharalar qabyldaýdy tapsyrdy, dep habarlaidy "Ult aqparat".
«Birinshiden, Ekologiia ministrligi óńirlerdiń ákimdikterimen birlesip, Jol kartalarynyń is-sharalary belgilengen merzimde oryndalýyn qamtamasyz etsin. Jumystyń oryndalýyna naqty monitoring júrgizsin jáne turaqty negizde halyqpen kezdesý ótkizsin. Ekinshiden, ekologiia máselelerin sheshýde qoqysty ruqsatsyz tógýdi jáne poligondardy baqylaý máselesi mańyzdy faktor. Búgingi kúni óńirlerde qatty turmystyq qaldyqty jetkizýge arnalǵan 3,5 myń oryn bar. Onyń ishinde tek 620 ǵana olarǵa talapqa sai. Ekologiia ministrligine óńirlerdiń ákimdikterimen birlesip, ruqsatsyz qoqys tógilgen jerdiń bárin jabý jóninde pármendi sharalar qabyldaýdy jáne de resýrsy sarqylǵan poligondardy jabýdy tapsyramyn», - dedi Asqar Mamin.
Úkimet basshysy úshinshiden Qazaqstan 2016 jyly Klimatqa qatysty Parij kelisimin ratifikatsiialaǵanyn, parniktik gazdar shyǵaryndylaryn 1990 jylǵy deńgeiden 2030 jyly 15 paiyzǵa qysqartý jóninde sózsiz mindettemelerdi qabyldaǵanyn eske saldy. Ol úshin qazirgi ýaqytta 2050 jylǵa deiingi Qazaqstannyń tómen kómirtekti damý tujyrymdamasy ázirlenip jatyr.
«Qabyldanǵan halyqaralyq mindettemelerdi oryndaý úshin qazirden bastap parnik gazynyń shyǵaryndy ósimin tómendetý jónindegi jumys qarqynyn údetý kerek. Osyǵan orai Ekologiia ministrligi múddeli memlekettik organdarmen jáne qoǵamdyq uiymdarmen birlesip, Tujyrymdamany ázirleýdi tezdetsin jáne onyń jobasyn kelesi jyldyń ekinshi toqsanynda Úkimetke engizsin», - dep túidi Asqar Mamin.
