Búgin Úkimet otyrysynda Premer-Ministr Baqytjan Saǵyntaev ekonomikalyq ósim boiynsha óńirlerdiń kemshilikterin atady, dep habarlaidy QazAqparat.
«Biylǵy jeti aidyń qorytyndysy boiynsha ósim 4 paiyzdy qurap otyr. Bul kórsetkish belgilengen meje qalpynda, sol sebepti osy baǵyttaǵy jumystarymyzdy ary qarai jalǵastyrýymyz kerek», - dep toqtaldy Úkimet basshysy.
Premerdiń sózinshe, josparlaǵan kórsetkishterge jetý usynystarynda keibir ministrlikter men ákimdikter tarapynan kemshilikter bar.
«Búgin baiandalǵan oblys, qala basshylary qurylys pen óndiris boiynsha ai saiynǵy aitatyn ýájderin qaitalady, ózgeris joq. Eger de biz bir kásiporynǵa nemese bir ǵana kásiporynnyń istegen jumysyna táýeldi bolsaq jumys ónbeidi. Sondyqtan da bul másele boiynsha ai saiyn ishki taldaý jasai otyryp, tiisti esepteýler júrgizý qajet. Baiandamalaryńyzdan kórip otyrǵandai, ondai saraptama baiqalmaidy. Iaǵni, tómen kórsetkishter ai saiyn ózgerissiz qalyp otyr. Sol sebepten, Investitsiialar jáne damý, Energetika ministrlikteri men basqa da salalyq vedomstvolar, sondai-aq óńirler el ekonomikasynyń ósimin qamtamysyz etý boiynsha tiisti sharalardy iske asyrýy qajet», - dedi B. Saǵyntaev.
Sonymen qatar, Premer-Ministr árbir óńirdegi ekonomikalyq ósim máselelerin qatań baqylaýǵa alýdy tapsyrdy.
«Elbasynyń joǵary kórsetkishterge qol jetkizý týraly mindetterin oryndaý úshin ai saiyn árbir óńirde ekonomikanyń barlyq salalary boiynsha tiisti ósim bolýy kerek. Ekonomika salalaryndaǵy ósimdi qamtamasyz etý úshin ortalyq jáne jergilikti atqarýshy organdar júieli jumystardy kúsheitýi tiis. Asqar Uzaqbaiuly (Úkimet basshysynyń birinshi orynbasary A. Mamin- avt.) bul baǵyttaǵy sharalardy baqylaýǵa alyńyz», - dedi Baqytjan Saǵyntaev.
Budan buryn habarlanǵandai, biylǵy qańtar-shilde ailarynda elimizde jalpy ishki ónimniń ósýi 4 paiyzdy qurady.
