Baqytjan Saǵyntaev óziniń orynbasarlaryna kásipkerlikti qoldaý máselesin baqylaýǵa alýdy tapsyrdy, - dep habarlaidy Ult.kz tilshisi premer-ministrdiń saityna silteme jasap.
QR premer-ministri Baqytjan Saǵyntaev Úkimet otyrysy barysynda Qazaqstanda biznesti odan ári qoldaý jáne oǵan ákimshilik kedergilerdi azaitýǵa qatysty birqatar tapsyrmalar berdi.
Otyrysta memlekettiń jáne biznestiń syndarly jumysynyń arqasynda ákimshilik kedergiler men ruqsat berý úderisteri máseleleri endi kóterilmeitini aityldy. Qazir birinshi kezekke otandyq taýar óndirýshilerdi qoldaý, salyqtyq ákimshilendirý jáne qarjy kózderiniń qoljetimdiligi máseleleri shyǵady.
Osyǵan bailanysty premer-ministr birqatar tapsyrmalar berdi.
"Salyqtar, nesieleý boiynsha kóptegen suraqtar bar. Ótken aptada biz "Atameken" basqarmasymen, ekinshi deńgeili banktermen kezdestik, bárinde nesieleý boiynsha suraqtar bar, barlyǵy bizde jumys jasap jatqan memlekettik baǵdarlamalardy qoldaidy. Memleket qosymsha aqsha bólip otyr, alaida "Agrobiznes-2020" jáne "Biznestiń jol kartasy-2020" baǵdarlamasyn qaita qaraý mindeti tur", - degen tapsyrma berdi premer-ministr óziniń orynbasarlary Asqar Mamin men Imanǵali Tasmaǵambetovke.
Premer-ministr nesieleýdiń qoljetimdiligi máselesine toqtaldy. Ol Úkimet Ulttyq bankpen birge nesie resýrstarynyń qoljetimdiligi máselesin jaqsartý boiynsha sharalar ázirlenip jatqanyn aityp ótti. Osyǵan bailanysty Ulttyq ekonomika ministrligine Ulttyq bankpen birge "Biznestiń jol kartasyna-2020" ózgerister engizý máselesin pysyqtaý qajet.
Bul tapsyrmalardyń oryndalý nátijesin Saǵyntaev 10 kúnnen keiin tyńdaýǵa nietti.
.jpeg)