Búgin Úkimettiń selektorlyq rejimdegi otyrysynda Premer-Ministr Baqytjan Saǵyntaev Qaraǵandy oblysynyń ákimi Erlan Qoshanovqa kómir tóńireginde týyndap otyrǵan problemalardy sheshýdi tapsyrdy, dep habarlaidy Ult.kz tilshisi QazAqparat agenttigine silteme jasap.
Otyrys barysynda Premer-Ministr kómirli óńir Qaraǵandynyń ózinde uzyn-sonar kezektiń oryn alǵanyn aityp, onyń sebebin óńir basshysy Erlan Qoshanovtan suraǵan edi.
«Áleýmettik nysandardy kómirmen qamtamasyz etýde oblysta problema joq. Kómir tolyq kólemde jetkizilgen. Alaida halyqty kómirmen qamtamasyz etýdegi dúrbeleń saqtalýda. Osy jyldarǵa deiin oblys turǵyndary kómirdi qazan aiynda satyp alatyn. Biraq biyl jylytý maýsymy 27 qyrkúiekte bastalyp ketti», - dedi ol.
Osy oraida onyń sózin bólgen Baqytjan Saǵyntaev: «Erlan Jaqanuly, sizshe, sonda halyq kináli bolǵany ma? Olar buryn qazanda alsa, biyl qyrkúiekten bastap, kómir satyp ala bastaǵan. Solai bolǵany ma?», - dedi Baqytjan Saǵyntaev.
Al Erlan Qoshanov óńirdegi aýa temperatýrasynyń kúrt tómendeý saldarynan kómirge suranys artyp, dúrbeleń bastalyp otyrǵanyn aityp aqtaldy.
«Baqytjan Ábdiruly, halyq aldyn ala kómir satyp almaidy. Sebebi, onda jatyp qalǵan kómirdiń sapasy tómendeidi. Biz tiisti saraptama júrgizgen de edik. Jyl saiyn qazan aiynda kómirdi satyp alatynbyz. Osy jyly 27 qyrkúiekte jylytý maýsymy bastalyp otyr. Biraq kómir óndirýde problema joq. Aǵymdaǵy jyldyń 9 aiynda 22 mln tonna kómir óndirilip, ótken jyldyń sáikes kezeńimen salystyrǵanda 1,6 mln tonnaǵa artyq boldy», - degen Qaraǵandy oblysynyń ákimi uzyn-sonar kezekte turǵandardyń 50 paiyzyn kórshi oblystarynyń turǵyndary quraityndyǵyn aitty.
Osydan keiin Baqytjan Saǵyntaev oǵan kómir máselesin qatań baqylaýda ustaýdy tapsyrdy.
