Úkimet otyrysynda QR Premer-Ministri Álihan Smaiylov «Bilimdi ult» ulttyq jobasyn tez arada qaita qaraýdy tapsyrdy, dep habarlaidy QazAqparat.
Álihan Smaiylov vedomstvonyń aldaǵy jobalary men usynystaryn qoldaitynyn aita kelip, birneshe tapsyrma berdi.
«Birinshi, Prezident tapsyrmalaryna sáikes, «Bilimdi ult» sapaly bilim berý ulttyq jobasyn tez arada qaita qaraý kerek.
Ekinshi, Ulttyq ekonomika, Qarjy ministrlikterimen birlesip Úkimettiń 2022 jylǵa arnalǵan is-qimyl josparynyń jobasyna balalardy balabaqshaǵa kezekke qoiýdyń biryńǵai tsifrlyq bazasyn qurý, tárbie jumysy tujyrymdamasyn qabyldaý, qosymsha bilim berýdiń biryńǵai ulttyq portalyn qurý jónindegi is-sharalardy engizý qajet», - dedi Úkimet basshysy.
Ol tapsyrǵan úshinshi mindet – kásiporyndardyń kolledjderdi qamqorlyqqa alýyn damytý jónindegi keshendi jospardyń jobasyn 10 aqpanǵa deiin Úkimet qaraýyna engizý.
«Tórtinshi, Jetekshi sheteldik joǵary oqý oryndarynyń filialdaryn ashý jónindegi jol kartasyn 7 aqpanǵa deiin engizý kerek.
Besinshi, Salalyq memlekettik organdarmen birlesip, tehnikalyq baǵyttaǵy ǵylymi kadrlardy daiarlaýǵa basymdyq berý qajet. Onyń ishinde jas ǵalymdarǵa granttar bólý jáne jyl saiyn jetekshi sheteldik ǵylymi ortalyqtarǵa jiberý jumystarynyń aiasynda da uiymdastyrylý kerek», - degen Álihan Smaiylov atalǵan jumystardy uiymdastyryp, baqylaýdy orynbasary Eraly Toǵjanovqa tapsyrdy.
