Qazaqstan Prezidenti Premer-Ministr Baqytjan Saǵyntaevty qabyldady, dep habarlaidy "Ult aqparat" Aqordaǵa silteme jasap.
Kezdesýde Úkimettiń 2018 jylǵy birinshi jartyjyldyqta atqarǵan jumystarynyń qorytyndylary, memlekettik jáne salalyq baǵdarlamalardyń iske asyrylý barysy talqylandy.
Nursultan Nazarbaev elimizdiń áleýmettik-ekonomikalyq damý kórsetkishteri artyp kele jatqanyna qaramastan, memleket tarapynan qabyldanǵan baǵdarlamalar turǵyndardy tolyq qamtymai otyrǵanyn aitty.
– Birinshi jartyjyldyq aiaqtaldy. Kórsetkishter ósip keledi. Jalpy, halyqtyń ál-aýqaty jaqsy. Biz indýstriialyq, infraqurylymdyq jáne áleýmettik baǵdarlamalar qabyldadyq. Alaida, jergilikti atqarýshy organdar men ministrlikter olardy tolyq oryndamai otyr, bekitilgen baǵdarlamalar óńirlerge jetpei jatyr, – dedi Memleket basshysy.
Elbasy kommýnaldyq qyzmet kórsetý tarifteriniń óskenine jáne elimizdegi joǵary oqý oryndaryndaǵy oqý aqysynyń qymbattaǵanyna toqtalyp, meditsinalyq qyzmet pen bilim sapasynyń tómendep bara jatqanyn atap ótti.
– Kommýnaldyq qyzmetterdiń baǵasy ósti. Meditsinalyq qyzmet kórsetý nasharlady. Bilim alý qymbattap barady. Jastar bizdiń ýniversitetterdegi bilim sapasynyń tómendigine bailanysty Reseidiń joǵary oqý oryndaryn tańdaityn boldy. Bizdiń qoǵamda osyndai problemalar jii kóterilýde, – dedi Memleket basshysy.
Qazaqstan Prezidenti el ekonomikasyndaǵy shaǵyn jáne orta biznestiń rólin arttyrý, sondai-aq kásibi memlekettik apparat qalyptastyrý máselelerine toqtaldy.
Nursultan Nazarbaev «Bes áleýmettik bastamany» jáne infraqurylymdyq damý baǵdarlamasyn sapaly júzege asyrýdyń mańyzdylyǵyn atap ótti. Sonymen qatar, Memleket basshysy óńirlerde jol salý máselesine de nazar aýdardy.
Sońynda Qazaqstan Prezidenti Úkimet pen jergilikti atqarýshy organdar tarapynan qabyldanǵan memlekettik jáne salalyq baǵdarlamalardyń sapaly oryndalýyn qamtamasyz etýdi jáne olardyń júzege asyrylýyna muqiiat baqylaý jasaýdy tapsyrdy.
