QR Premer-Ministri Asqar Mamin Reformalar jónindegi joǵary keńes otyrysy boiynsha tapsyrmalar berdi, dep habarlaidy QazAqparat.
«Reformalar jónindegi joǵarǵy keńestiń otyrysynda birqatar strategiialyq qujattar maquldandy jáne birqatar máselelerdi jedel oryndaý qajet. Joǵarǵy keńestegi talqylaýdy eskere otyryp, Ulttyq ekonomika ministrligine Strategiialyq josparlaý jáne reformalar agenttigimen birlesip, bir apta merzimde Memlekettik josparlaý júiesiniń jobasyn Prezident Ákimshiligimen pysyqtaýdy tapsyramyn», - dep atap ótti A. Mamin Úkimettiń búgingi otyrysynda.
Ekinshiden, «Qazaqstan-2050» strategiiasy – Elbasy Nursultan Nazarbaevtyń mańyzdy bastamasy ári strategiialyq josparlaý júiesiniń negizgi qujaty, onda el damýynyń uzaq merzimdi basymdyqtary aiqyndalǵan.
«Bul qujatty júieli túrde iske asyrý úshin «Ulttyq basymdyqtar» quraly engiziletin bolady, ol «2050 Strategiiasynyń mindetterin eskere otyryp, qysqa merzimdi kezeńderde el damýynyń negizgi basymdyqtaryn belgileidi. Strategiialyq josparlaý agenttigi Ulttyq ekonomika ministrligimen birge 10 aqpanǵa deiin Ulttyq basymdyqtardy qabyldaý týraly tiisti jarlyq jobasyn engizsin», - dedi Premer-Ministr.
Sonymen birge, Úkimet otyrysynda eldiń 2025 jylǵa deiingi damýynyń ulttyq jospary qaraldy. Ol Elbasy Nursultan Nazarbaevtyń strategiialyq bastamalary – «Qazaqstan-2050» Strategiiasyn, 5 institýtsionaldyq reformany iske asyrý jónindegi 100 naqty qadamdy, jáne de Memleket basshysy Qasym-Jomart Toqaevtyń Joldaýy men «NurOtan» partiiasynyń sailaýaldy baǵdarlamasyn iske asyrý úshin ázirlengen.
«Bul qujat ekonomikanyń ornyqty ári sapaly ósýin qamtamasyz etý arqyly halyqtyń áleýmettik ál-aýqatyn arttyrý úshin Úkimet jumysynyń orta merzimdi perspektivadaǵy basty baǵdary bolmaq. Ulttyq ekonomika ministrligi Strategiialyq josparlaý agenttigimen birge 10 aqpanǵa deiin eldiń 2025 jylǵa deiingi damýynyń ulttyq josparyn qabyldaý týraly tiisti jarlyq jobasyn engizsin. Strategiialyq josparlaý agenttigi Ulttyq ekonomika ministrligi jáne múddeli memlekettik organdarmen birge bir ai merzimde Ulttyq jobalardyń tizimin qalyptastyrsyn», - dep tapsyrma berdi Asqar Mamin.
