Búgin Praimeriz ótkizý jónindegi Ortalyq uiymdastyrý komitetiniń otyrysynda «Nur Otan» partiiasyna jańa músheler qabyldaýdy biylǵy 11 qyrkúiekten 4 qazanǵa deiingi aralyqta, iaǵni daýys berý aiaqtalǵanǵa deiin toqtata turý týraly sheshim qabyldandy.
Bul týraly «Nur Otan» partiiasy Tóraǵasynyń birinshi orynbasary Baýyrjan Baibek Feisbýktegi paraqshasynda habarlady.
«Sońǵy kezde bizge jekelegen azamattardan «óz» kandidattaryna daýys bergizý maqsatynda partiiaǵa májbúrlep kirgizý týraly «aryzdar» túsýde. Buǵan múldem jol berýge bolmaidy dep esepteimin. Mundai árbir faktini túrli deńgeidegi partiialyq baqylaý komissiiasy jan-jaqty qaraityn bolady.
Jarǵymyzǵa sáikes partiiaǵa múshe bolý elimizdiń árbir azamatynyń erikti jáne ózindik tańdaýy bolyp tabylatynyn taǵy da atap ótkim keledi. Sonymen, 1 tamyzdan beri «Nur Otan»-ǵa 25 myńdai jańa belsendi azamat múshelikke ótti. Sońǵy jyldary «partiialastar qataryn tazartý» aiasynda «Nur Otan»-nan 256 myń adam shyǵarylǵan bolatyn. Búginde partiiamyz qatarynda barlyǵy 835 myń qazaqstandyq bar» dep jazdy Baýyrjan Baibek.
Sondai-aq, ol daýys berý kezinde onlain-daýys berýdiń aiqyndyǵyn qamtamasyz etý úshin qandai tásil qoldanylatynyn atap ótti.
«Ózderińizge málim, praimerizde onlain-daýys berýdiń aiqyndyǵyn qamtamasyz etý úshin biz arnaiy rastaý (verifikatsiia) júiesin paidalanyp otyrmyz (tulǵany internet-banking úlgisi boiynsha anyqtaý). Júieniń printsipi: «Bir daýys, bir JSN, bir mobildi nómir jáne bir IP-adres». Eger osy derekterdiń biri sáikes kelmese, onda adam «praimeriz» aqparattyq júiesine tirkele almaidy, iaǵni daýys bere almaidy. Munyń barlyǵy túrli aila-sharǵyǵa, burmalaýshylyqtarǵa, sondai-aq yqtimal jappai daýys berýge jol bermeý maqsatynda istelip otyr», - dedi ol.
Sóz sońynda Partiia Tóraǵasynyń birinshi orynbasary barlyq tártip buzý faktileri boiynsha 8 (800) 080 4441 (qońyraý soǵý tegin) jedel jelisine ne komek@nurotan.kz elektrondy pochtasyna habarlaýǵa bolatynyn aitty.
