Postkeńestik elderdegi memlekettik basqarý salasyndaǵy kóshbasshylyq máseleleri men perspektivalary Amerikandyq memlekettik basqarý qoǵamynyń (ASPA) jyl saiynǵy konferentsiiasy aiasynda Astana memlekettik qyzmet habynyń (Hab) paneldik sessiiasynda talqylandy. Sessiiaǵa 20 álemniń elinen memlekettik basqarý salasynyń ǵalymdary, sarapshylary men praktikteri qatysty.
Paneldik sessiianyń ashylý rásiminde Basqarýshy komitettiń tóraǵasy Alihan Baimenov: «Basqarý júieleri búkil álemde jańa jaǵdailarǵa belsendi túrde beiimdelýde, bul tek zamanaýi tehnologiialar qoldanýǵa qatysty aitylyp otyrǵan joq. Qundylyqtar, korporativtik mádeniet jáne kóshbasshylyq mańyzy odan saiyn arta túsýde», - dedi. Ol, sondai-aq, aimaqtaǵy árbir eldiń memlekettik basqarýy ózindik tarihi, mádeni, geosaiasi jáne áleýmettik-ekonomikalyq faktorlar áserinen qalyptasqanyna toqtaldy. Al bastapqyda uqsas pozitsiiada bolǵan nemese tarihi damýy ortaq eldermen júrip ótken joldy birge saralaý, «kelise otyryp, ton pishý» mańyzdy ekenin atap ótti.
ASPA atqarýshy direktory Ýiliam Shilds Hab pen ASPA arasyndaǵy ózara túsinistik týraly memorandýmǵa qol qoiylǵanyna 5 jyl tolǵandyǵymen quttyqtady. «Hab memlekettik basqarý salasynda tájiribe men bilim almasý boiynsha memleketterge qoldaý kórsetý missiiasyn tabysty iske asyrýda jáne osy turǵyda ASPA-men kúshti ári airyqsha bir týystyq bailanys seziledi» dedi.
QR Prezidenti Ákimshiligi Basshysynyń orynbasary Timýr Sýleimenov qazirgi kezde halyqtyń úkimetke degen senimi úlken qysymǵa ushyrap otyrǵanyn aitty. Osyǵan orai pandemiiamen kúreste, kásiporyndardy qoldaýda, sondai-aq halyqty áleýmettik qorǵaýda memlekettik basqarý men memlekettik qyzmettiń atqaratyn róliniń asa zor ekendigin aitty.
Ekonomikalyq yntymaqtastyq jáne damý uiymynyń (EYDU) Memlekettik basqarý direktoraty basshysy Elza Pilichovski memlekettik sektor úshin, onyń ishinde onyń basshylaryna kúrdeli qoǵamdyq máselelerdi sheshe alatyndai jahandyq quzyretterdi damytýdyń mańyzdylyǵyna toqtaldy. Ol sondai-aq Habqa yntymaqtastyqty nyǵaitqany jáne EYDU elderi men aimaq arasynda tájiribe almasýǵa kómekteskeni úshin alǵysyn bildirdi.
Ázirbaijan, Grýziia, Qazaqsta, Latviia, Litva jáne Ýkraina úkimetteriniń ókilderi men sarapshylary memlekettik basqarý salasyndaǵy óz tájiribelerimen bólisti. Olar basqa faktorlarmen qatar ósý, daǵdarys nemese belgisizdik kezeńinde basqalarǵa yqpal etip, olardy is-áreketke jigerlendirý, alysty mejelep, ikemdi áreket etý kóshbasshylyq úshin sheshýshi ról atqaratynyn atap ótti.
Pikirtalasqa memlekettik qyzmetshilerdi yntalandyrý teoriiasynyń negizin qalaýshy professor Djeims L.Perri, ASPA-nyń burynǵy prezidenti doktor Stiven Kondri, Virdjiniia Dostastyq ýniversitetiniń professory Saltanat Libert jáne Belgiia federaldy memlekettik qyzmeti departamentiniń (BOSA) basshysy Piter Vandenbrýaiene siiaqty belgili ǵalymdar men memlekettik basqarý salasyndaǵy sarapshylar qatysty. Olar tájiribelerine súiene otyryp, memlekettik basqarýdaǵy kóshbasshylyqtyń ádisteri, stili men qundylyqtaryna qatysty oilary jáne usynystarymen bólisti.
Sessiia barysynda mamandar men ǵalymdar kóshbasshylyqtyń basqa da ózekti aspektileri týraly pikir almasty. Sondai-aq, Hab aýqymynda Palgrave Macmillan baspasynan postkeńestiktik 15 elde sońǵy 30 jyl ishinde memlekettik basqarýdyń damýy taldanatyn kitap baspaǵa daiyndalyp jatqandyǵy málim boldy.
Paneldik sessiianyń beineleri men materialdary Habtyń veb-saitynda www.astanacivilservicehub.org jáne Facebook-tiń www.facebook.com/hubastana qol jetimdi.
