AQSh memlekettik hatshysy Maik Pompeo 7 qańtarda Vashingtonda brifing ótkizip, Amerikanyń áýe shabýylynan qaza bolǵan Iran generaly Kasem Súleimanidiń Irakta «diplomatiialyq missiiamen júrdi» degen Tegerannyń málimdemesin joqqa shyǵardy.
«Djentlmen, diplomat dep júrgen Kasem Súleimani Baǵdatqa beibit missiiamen keldi degendi kórsetetin qandai da bir belgi bar ma?» dedi Pompeo jýrnalister aldynda.
Osyǵan deiin Iran biligi «general Súleimanidiń Irakta beibit kelissóz júrgizý úshin bardy» degen.
«Biz munyń shyndyqqa janaspaitynyn bilemiz» dedi Pompeo.
Pompeo brifing kezinde AQSh prezidenti Donald Tramptyń sózin qaitalap, «Quds kúshterin» basqarǵan Súleimanidiń aimaqtaǵy amerikalyqtarǵa shabýyl josparlaǵanyn aitty.
AQSh memlekettik hatshysy Tegeran Aýǵanstandaǵy beibit kólissózdi buzý úshin «belsendi túrde jumys istep jatyr» dep málimdep, Iran táliptermen jáne basqa da terrorlyq toptarmen bailanysy bar dedi.
«Iran aimaqtaǵy jáne halyqaralyq beibit kelissózderge qosylýdan bas tartty. Bul el sodyrlar tobyn qoldaý arqyly beibit kelissózderdi toqtatý úshin jumys istep jatyr» dedi Pompeo.
Islam revoliýtsiiasy korpýsynyń «Quds kúshteri» arnaiy jasaǵynyń qolbasshysy Súleimani 3 qańtarda Baǵdattaǵy AQSh-tyń áýe shabýyly kezinde mert bolǵan. Ony óltirýge AQSh prezidenti Donald Tramp tikelei buiryq bergen. «Quds kúshteri» Irannyń syrttaǵy áskeri operatsiialaryna qatysqan.
Tegeran «Súleimanidi óltirgen AQSh-tan kek alatynyn» málimdedi. AQSh prezidenti Donald Tramp ta «Tegeran shabýyl jasasa, Irannyń 52 ornyn bombalaitynyn» aitty.
