26 sáýirde AQSh memlekettik hatshysy Maik Pompeo Vashingtonda Qazaqstannyń Ulttyq qaýipsizdik komitetiniń tóraǵasy (UQK) Kárim Másimovpen kezdesti, - dep habarlady AQSh memlekettik departamentiniń baspasóz hatshysy Morgan Ortagýs.
AQSh memlekettik departamenti saitynda jariialanǵan habarlamaǵa sáikes, Pompeo men Qazaqstannyń Ulttyq qaýipsizdik komitetiniń tóraǵasy, "arnaiy prezident ýákili" Másimov eldegi "tarihi tranzit" pen maýsym aiynda ótetin prezident sailaýy, sonymen birge "terrorizmmen kúres salasynda ekijaqty áriptestikti" talqylaǵan.
Morgan Ortagýstyń habarlaýynsha, AQSh memlekettik departamenti Qazaqstannyń "Aýǵanstandaǵy beibitshilikti qoldaýyn quptap", "Qytaidyń batysyndaǵy adam quqyǵy jaǵdaiynyń ýshyǵýy" máselesin qozǵaǵan. Shyńjań-Uiǵyr avtonomiialyq ólkesinde qamalǵan musylmandar arasynda etnikalyq qazaqtar da bar ekeni kópten beri aitylyp keledi. Pompeo bul jaǵdaidan zardap shekkenderge AQSh-tyń qoldaý kórsetetinin jetkizgen.
Qazaqstannyń UQK-niń resmi saitynda ázirge bul kezdesý jaily aqparat shyqpady.
Shyńjań aimaǵyndaǵy lagerler jaily alǵash ret 2017 jyldyń kókteminde aityla bastaǵan. BUU Shyńjańdaǵy "saiasi tárbieleý ortalyqtarynda" millionǵa jýyq adam "erkinen tys" qamaýda otyrǵanyn málimdegen. Qytai úkimeti basynda bul ortalyqtardyń baryn joqqa shyǵaryp keldi. Keiin Pekin Shyńjańdaǵy saiasatyn "ekstremizmge qarsy shara" dep atap, adamdar erkinen tys otyrǵan lagerlerdi "til úirenip, kásipke baýlityn " ortalyqtar dep túsindirdi.
Quqyq qorǵaýshylar men ondai lagerde bolǵan azamattar bul ortalyqtardyń bilim berý mekemesinen góri túrmege uqsaitynyn, onda otyrǵan adamdarǵa qysym jasalatynyn aitqan.
