© americansecurityproject.org
Polsha premer-ministriniń orynbasary, ulttyq qaýipsizdik jáne qorǵanys komitetiniń tóraǵasy Iaroslav Kachinskii Welt am Sonntag basylymyna bergen suhbatynda eliniń aýmaǵynda AQSh-tyń iadrolyq qarýyn ornalastyrýǵa daiyn ekenin málimdedi, - dep habarlaidy Tengrinews.kz tilshisi "Kommersant" basylymyna silteme jasap.
"Eger amerikalyqtar bizden Polshada atom qarýyn ornalastyrýdy surasa, biz buǵan daiynbyz. Bul Máskeýdi oqshaýlaýdy aitarlyqtai arttyrady", - dedi Kachinskii.
Kachinskii sondai-aq AQSh-tan Eýropadaǵy amerikalyq ásker sanyn kóbeitýdi surady jáne áskerlerdiń basym bóligi NATO-nyń shyǵys qaptalyna ornalastyrylýy kerek ekenin aitty.
"Polsha Reseidiń únemi ósip kele jatqan agressivtiligi aiasynda AQSh-tyń qazirgi 100 000 sarbazyn 150 000-ǵa deiin kóbeitýdi quptaidy. Bul rette shyǵys qaptalǵa, iaǵni Reseimen shekaraǵa 75 000 sarbaz ornalastyrylsa, bir ǵana Baltyq jáne Polshada 50 myń jaýynger bolýy kerek", - dedi saiasatker.
Onyń aitýynsha, Polshada NATO-nyń úlken jedel basqarý ortalyǵyn qurý qajet, odan alianstyń birlesken operatsiialaryn josparlap, ótkizýge bolady.
"Bul Máskeýge NATO-nyń joǵary deńgeii Shyǵysta da bar ekendiginiń aiqyn belgisi bolar edi", - dedi Polsha premer-ministriniń orynbasary.
Kachinskiidiń málimdemesine túsinikteme bergen Máskeý Amerikanyń iadrolyq zymyrandary ornalasqan elder Resei úshin birinshi nómirli nysana ekenin aitty.
"Muny eshkim eshqashan jasyrǵan emes... Jáne bul iadrolyq zymyrandardyń qaida ornalasqany biz úshin mańyzdy emes. Eń bastysy, ol bizge úlken qaýip tóndiredi", - dedi RIA Novostige Reseidiń memlekettik servitýtyn qorǵaý jónindegi Federatsiia keńesiniń basshysy Andrei Klimov.
"Osyndai qaqtyǵys bolǵan jaǵdaida birden Polsha zardap shegedi", - dep basa aitty.
