QR parlamenti májilisiniń depýtaty Murat Temirjanov turǵyn úi baǵdarlamalarynda aýyl turǵyndaryna baspana salý baǵyty qarastyrylmaǵanyna ashýlandy, dep habarlaidy Sputnik Qazaqstan tilshisi.
Májilistegi úkimet saǵatynda depýtat Murat Temirjanov investitsiialar jáne damý ministrliginiń ókilinen aýyldarda jas mamandardy baspanamen qamtamasyz etý máselesi qashan tolyq sheshiletinin surady.
"Aýyldarda baspana salýǵa arnalǵan arnaiy baǵdrlama joq. "Nurly jer" baǵdarlamasy boiynsha, sizder bilesizder, satyp alý quqyǵynsyz arendalyq turǵyn úi bar. Qazir respýblika boiynsha 3 myń páter salynyp jatyr. Biraq bul baǵdarlamada da aýyldyq eldi mekender qamtylmaǵan. Kredittik baspana bar, olar negizinen qalalar men oblys ortalyqtarynda turǵyzylýda. Sodan keiin jeke turǵyn úi qurylysyna infraqurylym tartýǵa 80 milliard teńgege deiin aqsha bólinedi. Onyń 50 protsenti aýyldarǵa, qalǵan 50 protsenti qalalarǵa", — dep jaýap berdi QR IDM qurylys jáne turǵyn úi kommýnaldyq sharýashylyǵy komitetiniń tóraǵasy Marhabat Jaiymbetov.
"Vladimir Karpovich (májilis tóraǵasynyń orynbasary – avtor eskertp.), bul degen paradoks. Bizde halyqtyń 43 protsenti aýyldyq eldi mekenderde turady. Jaqynda "7-20-25" baǵdarlamasy qolǵa alyndy. Al ministrliktiń resmi ókili aýyl halqy turǵyn úi baǵdarlamalarynyń eshqaisysynda qarastyrylmaǵan deidi. Bul degen "polnyi marazm" ǵoi, — dep ashýlandy Temirjanov.
Aita ketsek, buǵan deiin QR Investitsiialar jáne damý vitse-ministri Qaiyrbek Óskenbaev aýyl turǵyndaryn baspanamen qamtamasyz etý úshin jeke turǵyn úi baǵdarlamasyn ázirleý kerektigin aitqan bolatyn. Aitýynsha, qazirgi "Nurly jer", "7-20-25" baǵdarlamalary aýyldarda iske asyrýǵa kelmeidi.
