QR Aqparat jáne qoǵamdyq damý ministri Dáýren Abaev Almaty kóshelerindegi qarsylyq sherýlerine qatysty 1200 shaǵym túskenin aitty, dep habarlaidy QazAqparat tilshisi.
Ministr Dáýren Abaev sailaý kezinde qaýipsizdik sharalaryn kúsheitýdiń ne úshin qajet bolǵanyn túsindirdi.
«Sailaýǵa bir kún qalǵanda bas prokýratýra halyqty jappai jiyndardan saq bolýǵa shaqyrǵan bolatyn. Ondai eskertý daýys berý naýqanynyń qalypty jaǵdaida ótýi úshin jasaldy. El úreilenip sailaýǵa barmai qoiýy múmkin edi», - dedi ol.
Onyń aitýynsha, Almatydaǵy túngi sherýler kezinde qala turǵyndary politsiiadan tynyshtyq ornatýdy suraǵan.
«Almatyda túnde jastardan quralǵan kolonna qoǵamdyq tártipti buzdy. Sol aýdandardyń turǵyndarynan IIM koll ortalyǵyna ǵana 1200 shaǵym túsken. Olar kóshege shyǵýshylardy tynyshtandyrýdy suraǵan. Smartfonnan qarap biik sózder aitý ońai. Al bolyp jatqan jaǵdaidy óz úiińniń terezesinen kórý múlde bólek. Shyndyǵyn aitqanda, talai adam qorqyp qaldy. Politsiianyń artyq ketken kezi de bolǵan shyǵar. Biraq olar qoǵamdyq tártipti saqtai aldy. Kúsh kórsetýlerge jol bermei, onyń jappai taralýyn boldyrmady», - dedi Dáýren Abaev.
Aqparat jáne qoǵamdyq damý ministri bul turǵyda sheteldik baiqaýshynyń aitqan sózin eske aldy.
«Eýropalyq baiqaýshylardyń biri Qazaqstanǵa qarsylyq bildirý jáne ony qabyldaý mádenietin kóteretin kez jetti, degen pikir aitty. Óte durys pikir. Qasym-Jomart Kemelulynyń keshegi málimdemesi sonyń bastaýy dep oilaimyn», - dedi ol.
Dáýren Abaev jańa Prezidenttiń ulyqtaý saltanatynda sóilegen sózine de toqtaldy.
«Prezident ekonomikadan bastap saiasatqa deiin árbir qazaqstandyqty alańdatatyn máselelerdi qozǵady. Bizge reformalar qajet. Ulttyq qoǵamdyq senim keńesiniń qurylýy sonyń basty qadamdarynyń biri bolmaq. Bul organ mańyzdy memlekettik sheshimder qabyldaý kezinde pikirler alýandyǵyn qamtamasyz etetinine senimdimin. Jalpy alǵanda, Qasym-Jomart Toqaevtyń keshe aitqan tapsyrmalary bizdi biriktiretin basty faktor bolýy tiis. Tuńǵysh Prezidentimizdiń sózi bar. «Qazaqty syrttan jaý alǵan emes.
Qazaqty álsirese alaýyzdyqtan álsiregen, kúsheise, birlikpen kúsheigen». Osy sózdi umytpaiyq», - dedi vedomstvo basshysy.
