Qazaqstanda politsiia qyzmetkerimin dep jalǵan nómirden habarlasyp, alaiaqtyq áreket jasaityndardyń qatary ósip barady. Bul týraly QR Ishki ister ministrliginiń ókili Shuǵyla Turlybai málim etti, dep habarlaidy QazAqparat.
«Ishki ister ministrligi qazaqstandyqtardy jańadan paida bolǵan alaiaqtyq áreket týraly eskertedi. Sońǵy ýaqytta politsiia jáne basqa da quqyq qorǵaý organdarynyń qyzmetkerimin dep jalǵan nómirden habarlasatyn alaiaqtar kóbeiip barady. Mysaly, alaiaq ózin tergeýshimin dep tanystyryp, onlain nesie rásimdeýge qatysty politsiiaǵa zardap shegýshilerdiń shaǵym jasap jatqanyn aitady. Artynsha ol adamnan jeke málimetterdi surai bastaidy. Ondaǵy maqsat – klienttiń JSN, bank kartasy men esepshotyna qol jetkizý. Odan ári alaiaqtyq áreket jasaidy», - dedi Shuǵyla Turlybai ministrlikte ótken baspasóz máslihatynda.
Ministrlik ókili politsiia qyzmetkerleriniń azamattardan jeke málimetter men bank esepshotyna qatysty derekti suramaitynyn eskertedi.
«Eger sizge beitanys adam habarlasyp, ózin politsiia nemese bank qyzmetkerimin dep tanystyryp jeke málimetterińizdi surasa dereý shara qabyldaýdy suraimyz. Sonymen qatar bank kartasy men esepshottyń qupiiasózin ózińizden basqa eshkim bilmegeni jón. Sol siiaqty bógde adamǵa jeke málimetterdi taratpaǵan abzal», - deidi ol.
