Túrkiia politsiiasy Stambýlda jańa jyl keshinde túngi klýbqa jasalǵan shabýylǵa Ózbekstan azamaty Abdýlǵadyr Masharipovty (laqap aty Abý Muhammed Horasan) kúdikti dep sanaidy. Bul týraly túrkiialyq Daily Sabah basylymy habarlady.
Tergeýshiler boljamy boiynsha, kúdikti túngi klýbta qarýdan 180 oq atqannan keiin klýbtyń as bólmesine ótip, kiimin aýystyrǵan soń ózge jurtpen birge klýbtan jylystap shyǵyp, taksi ustap iz jasyrǵan. Onyń klýbtan shyǵyp taksige mingen sáti kóshedegi beinekameraǵa túsip qalǵan.
Buǵan deiin Stambýldaǵy shabýylǵa Ortalyq Aziiadaǵy postsovettik elderden shyqqandardyń qatysy bolýy múmkin degen aqparatpen birge "kúdiktiniń ózin ózi túsirgeni" (selfi) delingen beinekadr da taraǵan edi. Internette kásipker Qyrǵyzstan azamatynyń qujatynyń kóshirmesi jariialanǵan. Biraq ol adam shabýyl jasalǵan sátte túngi klýbta bolmaǵanyn málimdep, keiin onyń Stambýldaǵy oqiǵaǵa qatysy joǵyn Qyrǵyzstan arnaiy qyzmeti rastaǵan.
Qańtardyń 1-ine qaraǵan túni Stambýldaǵy Reina túngi klýbyna jinalǵan birneshe júz adamǵa qarýly belgisiz er kisi jappai oq jaýdyrǵan. Saldarynan 39 adam qaza taýyp, 69 adam jaralanǵan. Qazaǵa ushyraǵandar arasynda onnan astam eldiń azamattary bar.
Stambýldaǵy shabýyldyń jaýapkershiligin "Islam memleketi" (IM) ekstremistik uiymy moinyna alǵan.
