Foto: Polisia.kz
Jańa oqý jylynyń bastalýyna orai elimizdiń barlyq mektebinde saltanatty is-sharalar ótti. Osyǵan bailanysty qoǵamdyq tártip pen jol qaýipsizdigin qamtamasyz etý úshin Ishki ister ministrligi tiisti sharalardy qabyldady, dep habarlaidy Polisia.kz.
Árbir bilim oshaǵyna politsiia qyzmetkerleri bekitildi. Patrýldik jasaqtar mektepterdiń mańyna barynsha jaqyn ornalastyrylyp, yqtimal jaǵdailarǵa der kezinde áreket etýge jáne oqýshylardyń qaýipsizdigin qamtamasyz etýge baǵyttaldy.
Bilim kúni tártip saqshylary quqyqtyq taqyryptaǵy dárister ótkizip, jeke qaýipsizdik erejeleri men jol qozǵalysy qaǵidalaryn túsindirdi.
Aita keteiik, 25 tamyz ben 10 qyrkúiek aralyǵynda respýblika boiynsha «Nazar aýdaryńyz, balalar!» aktsiiasy ótip jatyr. Onyń aiasynda bilim berý mekemeleriniń mańaiynda 5 myńnan astam tekserý júrgizildi. Nátijesinde mektepterdiń janynda 2 335 jol belgisi ornatylyp, jańartyldy, 1 007 jaiaý júrginshi ótkeli salyndy, 18 752 metr trotýar tóseldi. Sondai-aq balalardy tasymaldaýǵa arnalǵan 1 780 kólik quraly tekserildi.
Ishki ister ministrligi aldaǵy ýaqytta da oqý oryndarynyń mańynda qoǵamdyq tártipti saqtaý, balalardyń qaýipsizdigin qorǵaý jáne oqýshylardyń quqyqtyq ári jolda júrý mádenietin arttyrý baǵytyndaǵy aldyn alý jumystaryn jalǵastyra bermek.
