Elorda politsiiasy qala mektepteri biriniń 5 synyp oqýshylaryna sabaq ústinde porno slaid kórsetken adamdy izdep jatyr. Bul týraly Nur-Sultan qalalyq politsiia departamentiniń baspasóz qyzmetinen málim etti, dep habarlaidy "Ult aqparat".
«2020 jyldyń 3 qyrkúieginde, saǵat 16-30-da «ZOOM» platformasynda matematika sabaǵyn ótip jatqan elorda mektepteriniń biriniń 5 synyp oqýshylaryna bógde adam qosylyp, balalardyń kompiýter ekranynda uiatsyz slaidtar kórsetip, boqtyq sóz aitqan. Osylaisha ol matematika sabaǵynyń ótýine bóget jasaǵan. Onlain-sabaq rejimine 14 oqýshy qatysqan», - dep atap ótedi departamentten.
Qazirgi ýaqytta Nur-Sultan qalalyq politsiia departamenti atalǵan fakti boiynsha QR Qylmystyq kodeksiniń 311-baby boiynsha qylmystyq is qozǵady.
«Kináli tulǵa jaýapkershilikke tartylady. Qazirgi ýaqytta tekserý júrip jatyr», - dedi vedomstvodan.
Aita keteiik, Qylmystyq kodekstiń 311-baby pornografiialyq materialdardy nemese zattardy zańsyz taratýǵa qatysty qoldanylady.
Atalǵan bapta pornografiialyq materialdardy nemese zattardy taratý nemese jarnamalaý maqsatynda olardy zańsyz daiyndaý, taratý, jarnamalaý, sol siiaqty pornografiialyq sipattaǵy baspa basylymdaryn, kino- nemese beinematerialdardy, beinelerdi nemese ózge de zattardy zańsyz alyp ótý nemese olarmen saýda jasaǵany úshin múlki tárkilenip nemese onsyz, eki myń ailyq eseptik kórsetkishke deiingi mólsherde aiyppul salýǵa ne sol mólsherde túzeý jumystaryna ne alty júz saǵatqa deiingi merzimge qoǵamdyq jumystarǵa tartýǵa ne eki jylǵa deiingi merzimge bas bostandyǵyn shekteýge ne sol merzimge bas bostandyǵynan aiyrýǵa jazalanatyndyǵy kórsetilgen.
