Ishki ister salasynda 24 jyldan beri eńbek etip kele jatqan Baqytjan Asqarov búginde Túrkistan oblystyq politsiia departamenti patrýldik politsiia basqarmasynyń aǵa inspektory qyzmetin atqarady. Jumys barysynda kóbine kúzetiletin tulǵalarǵa jol bastap júretin azamat ýaqytpen sanaspai qyzmet etýde, dep habarlaidy QazAqparat.
Qonaqtardyń arasynda qaýipsizdigi arnaiy zańmen bekitilgen tulǵalar men shetelden keletin týrister de bar. Qiyn da ári jaýapty jumysty atqarý barysynda politsei áriptesi Qairat Álibekov ekeýi kólik júrgizedi. Olar qonaqtardy mejeli jerge jetkenshe joǵary jyldamdyqty túsirýge jáne toqtaýǵa bolmaidy.
«Jaýapty jumysty abyroimen atqarý biz úshin úlken mindet. Sondyqtan bar kúsh-jigerimizdi jumsaimyz. Kúzetiletin tulǵalardyń joldaǵy qaýipsizdigin saqtap, keptelisterge kezikpei tez arada mejeli jerge jetkizýge tyrysamyz. Jolda júrgen soń, ártúrli oqiǵalarǵa kezdesemiz. Qiyndyqtardy qyzyqty jáittar jeńip ketedi»,– deidi politsiia aǵa leitenanty.
Baqytjan Asqarov áriptesimen birge tańerteńnen keshke deiin kólikte júredi. Sondyqtan isher asty da kólikke salyp alady. Sebebi, toqtap tústenýge, keshki asty jaibaraqat jeýge múmkindik joq. Jumys solai. Ýaqytqa baǵynbaidy. Túski mezgilde, keshki as ýaqytynda jolda bolýy ǵajap emes.
«Elbasymen, Premer-Ministrmen jáne ózge de ministrlermen birge júrdik. Sheteldik qonaqtardyń qasynda júremiz. Jolda árdaiym úlken jyldamdyqpen júremiz. Oqystan kólik shyǵyp qalatyn kezder kóp bolady. Ótken jyly Arys qalasynda tótenshe jaǵdai bolǵan tusta dereý jolǵa shyqtyq. Basshylardyń kóliginiń aldynda biz júrip otyrdyq. Qiylystyń birinde jigýli kóligi eshqandai belgi bermesten oqystan solǵa burylyp qaldy. Soǵysýǵa sál-aq qaldyq. Tájiribeniń arqasynda kólik apatyna jol bermedik. Sońymyzdan kele jatqan basshylarda birden toqtap, jaǵdaiymyzdy bildi. Dereý kólikti otaldyryp, jumysymyzdy jalǵastyrdyq», – deidi B.Asqarov.
Búginde Baqytjan Jumabaiulynyń qyzmet babynda qol jetkizgen marapattary kóp. Ministrlikten, oblys ákiminen alǵan alǵys hattary bar. Odan bólek memlekettik medalǵa da ie bolǵan. Otbasynda jubaiy Janarmen úsh qyz, eki ul tárbielep, ósirip otyr. Qazir eki nemeresi bar. Uly Maqsat onyń jolyn qýyp, Túrkistandaǵy patrýldik politsiiada qyzmet atqarýda. Al, kelini Gúlnaz Shymkent qalasyndaǵy patrýldik bólimde eńbek etýde. Ekeýi de Almatydaǵy akademiiada joǵary bilim alǵan.
«Politsiia qyzmetkeri bolý úshin bilim de, bilik te, bilek te kerek. Sabyr, tózim jáne qajyr-qairat qajet. Shapshańdyq pen jyldamdyq, tez sheshim qabyldap, jyldam áreket ete bilý qabileti politseige qajetti basty qasietterdiń qatarynda. Ustamdy bolý men azamattarmen til tabysa bilý, sypaiy bolý da asa mańyzdy. Úide ul-qyzyma, jumysta áriptesterime árdaiym bilgen keńesimmen bólisip otyramyn», – deidi aǵa leitenant.
