Nur-Sultan qalalyq politsiia departamenti tergeý basqarmasy bastyǵynyń orynbasary Qairat Artyqov «Han Shatyrda» kóz jumǵan balaǵa qatysty istiń mán-jaiyn túsindirdi, dep habarlaidy QazAqparat.
«Oqiǵa osy jyldyń maýsym aiynyń úshinde bolǵan. Nur-Sultan qalasy №10 gimnaziiasynyń oqýshylary oqýdan keiin birneshe jasaq bolyp, Han-Shatyr OSO-ǵa keledi. Olar 4-qabattaǵy demalys ornyna kelgen. Saǵat 11-ge taiaǵan kezde jasóspirim qyz saiajaidaǵy basseinge túsip, sýǵa batyp ketken. Sol jerde bolǵan qutqarýshylar qyzdyń denesin shyǵaryp, oqiǵa ornynda bolǵan meditsinalyq qyzmetkerler alǵashqy kómek kórsetedi. Jedel járdem shaqyrylady. Biraq, kómek kórsetýden nátije shyqpai, jasóspirim qyz jan tapsyrdy», - dedi Qairat Artyqov elordada ótken baspasóz máslihatynda.
Onyń aitýynsha, atalmysh oqiǵa boiynsha qylmystyq is qozǵalyp, sol jerde bolǵan Han-Shatyr OSO qyzmetkerlerinen, qutqarýshylardan, meditsinalyq qyzmetkerlerden, balalardy sol jerge alyp kelgen gimnaziianyń muǵalimderinen jaýap alynǵan.
«Qutqarýshylardyń is-áreketine qatysty tekseris taǵaiyndalyp, tiisti jumystar atqarylyp jatyr. Basseinde balalar kóp boldy. Ol qyz sýdyń astyna ketkende janynda bolǵan qyzdar aiqailap-shýlap, muǵalimderdi shaqyrǵan. Muǵalimder tez arada qutqarýshyǵa aitqan. Qutqarýshy sýǵa sekirip, balany shyǵarǵan. Balany, bizdiń bilýimizshe, eki-úsh minýttyń ishinde alyp shyqqan. Biraq ol sýdy kóp jutyp qoiǵan. Saldarynan sol jerde qaitys boldy», - dedi ol.
Buǵan deiin elordadaǵy «Han Shatyr» SOSO basseininde qyz bala sýǵa ketip, tergeý amaldary júrgizilip jatqanyn habarlaǵan edik.
