Foto: ©️ Tengrinews.kz / Álihan Sariev
Qazaqstanda jekemenshik elektrosamokattardy baqylaý tehnikalyq turǵydan múmkin emes. Bul týraly Ishki ister ministrligi Ákimshilik politsiia komitetiniń tóraǵasy Qaisar Sultanbaev málimdedi, dep habarlaidy Sputnik Qazaqstan.
Senat kýlýarynda jýrnalister IIM ókilinen azamattar óz aqshasyna satyp alǵan elektrosamokattardyń jyldamdyǵy qalai baqylanatynyn surady.
"Jalǵa beriletin samokattar kikshering arqyly baqylanady, adamdar ózderi satyp alǵan samokattardy qalai baqylaidy dep otyrsyz ǵoi. Rasynda da ony baqylaý tehnikalyq turǵydan, politsiia tarapynan múmkin emes dep aitýǵa bolady. Ondai múmkindik joq. Al eger jol apaty bolǵan jaǵdaida, adam qaǵyp ketse nemese dene jaraqatyn alsa, biz arnaiy saraptama jasaimyz. Sonyń nátijesinde samokattyń jyldamdyǵy qansha bolǵanyn anyqtaimyz. Sol saraptama negizinde samokat júrgizýshisin jaýapqa tartýǵa bolady", - dep jaýap berdi Sultanbaev.
Onyń aitýynsha, jol erejelerin buzǵan elektrosamokat júrgizýshileri Ákimshilik quqyqbuzýshylyqtar týraly kodekstiń eki baby boiynsha jaýapqa tartylady.
Birinshisi – 593-bap, jolaýshylar men júkterdi tasymaldaý erejelerin buzý.
"Ekinshisi – 620-bap. Basqa da talaptardy buzǵany úshin osy bappen jaýapqa tartylady", - deidi komitet tóraǵasy.
Senat maquldaǵan zańǵa sáikes, elektrosamokat júrgizýshisi 18 jasqa tolǵan bolýy shart. Buǵan qosa basynda shlem, al qarańǵy ýaqytta ústinde jaryq shaǵylystyratyn zat bolýy kerek.
Joldyń júrý bóliginde jyldamdyqty saǵatyna 25 shaqyrymnan, al trotýarda 6 shaqyrymnan asyrýǵa bolmaidy.
Zań Prezidenttiń qaraýyna joldandy.
