Túrkistandaǵy №15 mekteptiń muǵalimin «ájethana kúzetpegeni úshin» ustap áketken qalalyq politsiia basqarmasynyń bastyǵy Daniiar Meiirhan ustazdan keshirim surady, dep habarlaidy "Ult aqparat".
Bul jóninde qala ákimi Rashid Aiýpov óziniń Facebook paraqshasynda jazdy.
«Túrkistandaǵy №15 mektepte oryn alǵan jaǵdai barshamyzdy alańdatty. Bul jaǵdaidy óz baqylaýyma alyp, mán-jaiyn anyqtadyq. Keleńsiz jaǵdailar oryn alyp jatady. Biraq, ustazdyń orny bólek, árdaiym bedeli biik. Balalarǵa bilim beretin jandar qashan da bizdiń qoldaýymyz ben qamqorymyzǵa júgine alatynyna senimdi bolýy tiis. Qalalyq ishki ister bóliminiń bastyǵymen birge ustaz aldyna bardyq. Ustaz úiinde politsiia basshysy keshirim surady, ustaz keshirimin berdi. Mundai jaǵdailar qaitalanbas úshin barlyq sharalar jasalatynyn habarlaimyz» dep jazdy shahar basshysy.
Eske sala keteiik, Túrkistanda Maǵjan Jumabaev atyndaǵy №15 orta mekteptiń muǵalimi Baqyt Keýkenov «ájethana kúzetpegeni úshin» jazyqty bolǵan edi. 31 jyldyq ótili bar ustazdy qalalyq ishki ister basqarmasynyń bastyǵy, politsiia podpolkovnigi Daniiar Meiirhan bastaǵan bir top politsei ustap áketken.
Mektep direktory K. Ábdiqadyrovanyń jazýynsha, muǵalim aiaq kiiminen sý ótken soń sony aýystyrý úshin mektep ǵimaratyna kirgen. Alaida politseiler qarsylyq kórsetkenine qaramastan ustazdyń qolyn qaiyryp, bólimshege áketip qalǵan. Bul jaǵdaidy sol jerden ótip bara jatqan ustazdar men oqýshylar kórgen. Politsiia bolǵan oqiǵa boiynsha arnaiy hattama toltyryp, aiyppul rásimdep, tóletken.
Keiin bul jaǵdaidy estigen Bilim jáne ǵylym ministri Ashat Aimaǵambetov muǵalimge arasha tústi.
