QR Ishki ister ministrligi Tergeý departamentiniń bastyǵy Sanjar Ádilov qańtar oqiǵasynda zardap shekken turǵyndar men kásipkerlerge shyǵyn ornyn toltyrý sharalary týraly aityp berdi, dep habarlaidy QazAqparat.
«Politsiia organdary jumysy eń áýeli zardap shekken azamattarǵa, biznes ókilderine járdemdesýge jáne keltirilgen zalal ornyn toltyrý sharalaryna baǵyttalǵanyn atap ótkim keledi. Azamattar men kásipkerlik sýbektileriniń urlanǵan múlkin anyqtaý jáne alý boiynsha jumys ta jalǵasýda. Jappai tártipsizdikter barysynda 1502 biznes obektisi shabýylǵa ushyrady, onyń ishinde 1360 saýda núktesi men dúken, 36 bank ofisi men kóshedegi bankomat, 31 qoǵamdyq tamaqtaný orny, 26 lombard, 21 janarmai stantsiialary, 6 bazar, 4 valiýta aiyrbastaý pýnkti, 3 dárihana, 1 avtosalon men kásipkerliktiń basqa da obektileri bar», - dedi S. Ádilov Ortalyq kommýnikatsiialar qyzmetinde ótken brifingide.
Onyń aitýynsha, politseiler jalpy somasy 288 mln teńdegen asatyn urlanǵan múlikti tapqan.
«Zalaldyń ornyn toltyrýdy qamtamasyz etý jalǵasady jáne jumystyń anaǵurlym basym baǵyty bolyp qala beredi. Barlyǵy qylmystyq ister boiynsha 1,5 myńnan artyq jeke jáne zańdy tulǵa jábirlenýshi retinde tanyldy, 12 myńnan astam azamattan kýá men jábirlenýshi retinde jaýap alyndy, 2200 sot saraptamasy taǵaiyndaldy», - dedi Sanjar Ádilov.
