Foto: Polisia.kz
Astana politseileri qaiǵyly oqiǵanyń aldynda aldy. Tártip saqshylary balalarymen birge terezeden sekirmek bolǵan áieldi qutqaryp qaldy, dep habarlaidy "Ult aqparat" Polisia.kz portalyna silteme jasap.
"Shahar turǵyny eki balasyn ustap 9-shy qabattaǵy páterdiń terezesinen sekireiin dep jatqanyn estigen avtopatrýl oqiǵa ornyna attandy.
Alǵashqy bolyp №26 ýchaskelik politsiia pýnkti politsiia bólimshesiniń aǵa inspektory Asqar Papyshev óziniń seriktesi Eldos Nuǵmanovpen birge jetti. Olar aýdan turǵyndarymen jiyn ótkizip jatqan" - delingen habarlamada.
9-shy qabatqa kóterilgen politseiler úlken balanyń ákesimen birge turǵanyn kóredi. Al kishi balasyn áiel ózi ustap, oǵan bireý jaqyndasa, sekiretinin aityp aiqailaǵan. Tártip saqshylarynyń biri áieldi sózge tartyp, mundai qadamǵa barmaýyn ótinip jatqanda, ekinshi politsei formasyn azamattyq kiimge aýystyryp, sosyn páterge kirip, baiqamai jaqyndap, bir qolymen balanyń qolynan, ekinshi qolymen anasyn myqtap ustap alyp, bólmege qarai tartyp kirgizgen.
24 jastaǵy áieldiń mundai áreketke otbasylyq janjaldan keiin bel býǵany belgili boldy.
"Onyń kúieýine qatysty Ákimshilik quqyq buzýshylyq týraly kodekstiń 73-babynyń 1-bóligi “Otbasylyq-turmystyq qatynastar salasyndaǵy quqyqqa qaishy áreketter” boiynsha ákimshilik hattama toltyryldy.
Otbasy erekshe baqylaýǵa alyndy. Áiel balalarymen birge Astana qalasynyń daǵdarys ortalyǵyna ornalastyryldy. Onymen profilaktikalyq áńgime júrgizilip, psihologiialyq kómek kórsetildi" - deidi IIM baspasóz qyzmeti ókilderi.
