Almaty oblysynyń politseileri Armeniialyq kólikterdi zań talabyna sáikes tirkeýge qoiýdyń tártibin túsindirdi, - dep habarlaidy "Ult aqparat".
«Memleket basshysynyń tapsyrmasyna sáikes, Armeniia Respýblikasynan elimizge ákelingen kólikterdi ýaqytsha tirkeýge qoiý máselesi birizdendirilgen bolatyn. Biregei aktsiianyń aiaqtalý merzimi 2021 jyldyń naýryz aiyna deiin uzartylǵanyn da avtoáýesqoilar jaqsy biledi.
Elimizdegi qoldanystaǵy zańnamaǵa sáikes basqarý tetigi, iaǵni róli oń jaqta ornalasqan avtokólikter tirkeýge qoiylmaityny anyq. Osyǵan orai, Armeniiadan ákelingen osyndai kólik ielerine temir tulparlaryn tehnikalyq talaptarǵa sai qylýǵa múmkindik berildi. Barlyq qajetti protsedýralardan keiin olar kólikterin Almaty qalasy, Raiymbek dańǵyly, 312 mekenjaiynda ornalasqan «Almaty-Standart» ǵylymi-zertteý ortalyǵy» JShS bazasynda synaqtan ótkizip, qaýipsizdik kýáligin alýy tiis», - dedi Almaty oblysy Politsiia departaminti Ákimshilik politsiia basqarmasynyń bastyǵynyń mindetin atqarýshy politsiia polkovnigi Serikjan Ábjanov.
Politsiia ókiliniń aitýynsha, osyndai kýáligi bar kólik esh qiyndyqsyz tirkeýge qoiylady. Al, kóliktiń qaýipsizdigin tekserip, kýálik tabystaityn mekemeler elimizdiń soltústiginde Qostanai jáne Petropavl qalalary men batysyndaǵy Oral qalasynda da bar.
«Osy talapty oryndaǵan 29 kólikti tirkeýge qoidyq. Utymdy sátti paidalanyp, armeniialyq tirkeýdegi kóligi bar turǵyndardy osy múmkindikti paidalanyp, kólikterin zańdastyryp alýǵa shaqyramyn», - dedi politsiia polkovnigi Serikjan Ábjanov.
