Aqmola oblysynda jol patrýldik politsiiasynyń qyzmetkerin kólik kapotynda súiregen 24 jastaǵy er adam 5 jylǵa bas bostandyǵynan aiyryldy, dep habarlaidy "Ult aqparat" oblystyq PD baspasóz qyzmetine silteme jasap.
Vedomstvonyń málimetinshe, 2020 jyldyń 14 aqpanynda saǵat 15:00-de Jaqsy kentiniń mańynda, «Ekaterinbor-Almaty» avtojolynyń 917 shaqyrymynda «Qaýipsiz jol» jedel aldyn alý is-sharasyn ótkizý barysynda Aqmola oblysy Politsiia deparatamentiniń patrýldik politsiia batalonynyń 4-vzvod inspektorlary «Chevrolet Aveo» markaly avtokóligin toqtatqan. Kólik rýlinde Jaqsy kentiniń 24 jastaǵy turǵyny bolǵan.
Keiin anyqtalǵandai, er adam Jaqsy aýdandyq sotynyń úkimimen alkogoldik jáne esirtkige masań kúide rýlge otyrǵany úshin úsh ret kólik júrgizý quqyǵynan aiyrylǵan.
Politsiia qyzmetkerleri Ákimshilik quqyq buzýshylyqtyń jolyn kesý jáne adamdardyń ómiri men densaýlyǵyna tikelei qaýiptiń aldyn alý úshin tártip buzýshyny Jaqsy aýdanynyń politsiia bóliminiń ǵimaratyna jetkizdi.
Politsiia qyzmetkeri er adamǵa qatysty ákimshilik quqyq buzýshylyq týraly hattama jasady, iaǵni kólik quralyn júrgizý quqyǵynan aiyrylǵan júrgizýshiniń kólik quralyn basqarýy boiynsha. Hattama jasaý barysynda «Chevrolet Aveo» markaly avtokóligi Arshaly aýylynyń 40 jastaǵy turǵynyna tiesili ekeni anyqtaldy.
Er adamnyń buryn kólik quralyn basqarý quqyǵynan aiyrylǵanyn, avtomobildiń menshik iesi bolmaǵanyn jáne ózimen birge kólik quralyna arnalǵan tirkeý jáne zańnamada belgilengen ózge de qujattary joq ekenin eskere otyryp, tártip saqshylary Ákimshilik quqyq buzýshylyq kodeksiniń 785, 796 jáne 797-baby birinshi bóliginiń 1) tarmaqshasynyń talaptaryna sáikes, Ákimshilik quqyq buzýshylyq týraly is boiynsha is júrgizýdi qamtamasyz etý sharalaryn qabyldady. Kólik quralyn basqarýdan shettetý hattamasy jasaldy. Odan keiin politseiler ýaqytsha saqtaý úshin arnaiy turaqqa ornalastyrý úshin «Chevrolet Aveo» avtokóligin alý aktisin jasai bastaidy. Osy kezde qaskúnem politsiia bóliminiń ǵimaratynan syrtqa júgirip shyǵyp, «Chevrolet Aveo» avtokóliginiń rýline otyrady. Onyń artynan ilese shyqqan tártip saqshysy toqtatpaq bolady. Er adam politsiia inspektoryn qaǵyp, ol kapottyń ústine qulaidy.
«Saraptama nátijeleri boiynsha onyń kanabioidtardy (marihýana) qoldanǵany anyqtaldy», - deidi vedomstvodan.
Eń qyzyǵy, quqyq buzýshy bolyp jatqannyń bárin uialy telefonnyń beinekamerasyna túsirgen. Tipti, ózin ustaý kezinde de túsirýin toqtatpaǵan.
«Atalǵan fakti boiynsha sot sheshimimen 24 jastaǵy sottalýshy Qylmystyq kodekstiń 380-baby (bilik ókiline qatysty zorlyq-zombylyq qoldaný) jáne Qylmystyq kodekstiń 378-baby (bilik ókilin qorlaý) boiynsha kináli dep tanylyp, bes jylǵa bas bostandyǵynan aiyryldy», - dep tolyqtyrdy vedomstvodan.
