Almaty oblysynyń Sharyn shatqalynda selmen aǵyp ketken qyzdy izdestirý operatsiiasyna qatysqan politsei oqiǵanyń mán-jaiyn baiandap berdi. Qutqarý jumystaryna Uiǵyr aýdandyq politsiia bóliminiń 50-ge jýyq qyzmetkeri qatysqan, dep habarlaidy "Ult aqparat".
Jasóspirimdi izdestirýdiń ekinshi kúninde Uiǵyr aýdandyq politsiia bólimi, tabiǵat qorǵaý politsiia tobynyń inspektory Saiat Dárkenbaevqa qoryqshy ózen mańynda qozǵalystyń baiqaǵany týraly belgi bergen. Tártip saqshysy kómek shaqyrý úshin óz qyzmettik kóligimen bazaǵa kóterilgen. Artynsha tikushaqtaǵy qutqarýshylarǵa qyzdyń ornalasýy múmkin jerdi kórsete alatynyn aitqan.
«Áýe kóliginen Sharyn ózeniniń sol jaǵasynda, oqiǵa ornynan 3-4 shaqyrym jerde bir adamnyń jatqanyn baiqadyq. Alaida ol jerge tikushaq qona almaityn bolyp shyqty. Shatqal biiktigi shamamen 800-1500 metr. Ol jerdiń jaǵasy jartasty keledi. Men tikushaqtan shatqal úsinde túsip qalyp, úsh adamnan turatyn qutqarý tobyna ratsiia arqyly baǵyt-baǵdar berip turdym. Olar arqanmen ózenge qarai túsip, joǵalǵan qyzdy joǵary kóterdi. Qyzdyń amandyǵyn kórip, qýanyshtan ata-anasyna birden ratsiia arqyly habar berdim. Qutqarýshy toptyń óte kásibi jumys istegenin atap ótkim keledi. Qarshadai qyzdyń qarańǵyda, taýda basynan ne ótkergenin elestetý qiyn. Balapan tez jazylyp, ómirinde tek jaqsylyq bolsyn», - dedi politsiia qyzmetkeri Saiat Dárkenbai.
Eske salaiyq, 29 mamyr kúni Almatynyń №199 mektebiniń 5-synybynda oqityn 8 oqýshy, 5 ata-ana jáne 3 muǵalim Sharyn shatqalyna saiahatqa shyqqan. Shatqalda kenet sel júrip, 2 adam mert boldy, 1 adam iz-túzsiz joǵalyp, taǵy 6-aýy zardap shekti.
Keiinnen QR Bilim jáne ǵylym ministrligi atalǵan oqiǵa saldarynan 1 oqýshy men 1 muǵalimniń qaza tapqanyn, taǵy bir oqýshyny izdeý jumystary júrgizilip jatqanyn málim etti.
Mert bolǵan ustaz - 26 jastaǵy Merei Ibragimov kórkemóner pánderinen sabaq bergen. Eńbek ótili – 5 jyl.
30 mamyrda selge aǵyp ketken oqýshy qyz tabyldy. Qazir ol jansaqtaý bóliminde.
Búgin QR BǴM Balalar quqyǵyn qorǵaý komitetiniń tóraǵasy Esenǵazy Imanǵaliev bul saiahat mektep ákimshiligimen kelisilmegenin málim etti.
