Politsiia kúnine orai Almaty oblysy PD jergilikti politsiia qyzmeti basqarmasynda tiisti qorytyndylar jasalyp, tabiǵat qorǵaý baǵytynda úzdik politsei anyqtaldy, dep habarlaidy QazAqparat.
Atap aitqanda, úzdikter qatarynan Almaty oblysy PD Tabiǵat qorǵaý politsiiasy tobynyń inspektory Baǵlan Qanashuly Rymjanov kórindi.
«Bala kezimnen áskeri salada qyzmet etýdi armandadym. Osyǵan bailanysty sabaǵymdy jaqsy oqyp, sportpen shuǵyldandym. Bizdiń áýlettegi er adamdardyń kóbisi pogon taqty. Atam militsiiada qyzmet etken, ákem Qanash Rymjanov ýchaskelik inspektor qyzmetin atqardy. Aita keteiin, ákem Qaratal aýdanynyń qurmetti azamaty ataǵyna laiyqty boldy. Quqyq qorǵaýshy bolýyma qylmystyq izdestirý salasynda belgili adam, aǵamyz Talap Qadyrbaev kóbirek yqpal etti. Ol kisini úlgi tuttym. Sondyqtan bizdiń áýlette osy salada qyzmet etý dástúrli túrde jalǵasyp keledi», - dedi Baǵlan Rymjanov.
Aita keteiik, B. Rymjanovtyń eki joǵary bilimi bar. Úilengen, eki balany tárbielep otyr.
Politsiia kapitany Rymjanov tabiǵat qorǵaý salasynda jaqsy kórsetkishterdi kórsetip keledi. Ótken jyly jeke izge túsý arqyly qylmystyq quqyq buzýdyń jeti faktisin anyqtady. 2020 jyly da ol eleýli istermen kózge kórindi.
Onyń jetekshiligimen oblystyń tabiǵat qorǵaý politsiiasy biylǵy 5 aida 515 tártip buzý jaǵdaiyn anyqtap, onyń 60-y boiynsha qylmystyq is qozǵaldy, qalǵan 455-i ákimshilik quqyq buzý sanatyna jatqyzyldy.
Baǵlan Qanashulynyń atap ótýinshe, tabiǵatty qorǵaý – úlken jaýapkershilikti talap etedi.
