Almaty oblysynda órtengen kúii tabylǵan politsiia qyzmetkeriniń ólimine qatysty tyń málimetter jariia boldy, dep habarlaidy ult.kz Stan.kz saityna silteme jasap.
Marqumnyń jubaiy da buǵan deiin politsiia salasynda qyzmet atqarǵan, alaida ol biyl aqpan aiynda jumystan ketken. Jaqyndarynyń aitýynsha, maior Aslan Álserov otbasynda jii janjal shyǵaryp, áieline birneshe ret qol kótergen. Áieli buǵan deiin birneshe márte Bostandyq aýdandyq politsiia basqarmasyna baryp, denesindegi jaraqat izderin kórsetkenimen, másele boiynsha naqty shara qoldanylmaǵan.
Tergeý málimetinshe, qaiǵyly oqiǵa bolǵan kúni politsiia qyzmetkeri úiine kesh oralǵan. Otbasynda ustara júzine bailanysty janjal týyndap, arty tóbeleske ulasqan. Osy kezde úige erli-zaiyptylardyń 15 jastaǵy eki uly men olardyń 14 jastaǵy dosy kirgen. Tergeý nusqasyna sáikes, jasóspirimderdiń biri ákesiniń basynan qatty zatpen soqqy jasaǵan.
Odan keiin es-tússiz jatqan er adamdy kiimmen bailap qoiǵan. Kúdiktiler máiitti tún ishinde kópqabatty úi mańyndaǵy kólikke shyǵaryp, kórpege nemese jaimaǵa orap alyp ketken. Keiin kólik Almaty oblysy Kegen aýdanyndaǵy aýyldardyń biri arqyly ótip, Kókpek – Kóktal – Kegen tas jolynan taýǵa qarai shamamen jarty shaqyrym jerge barǵan. Sol jerde máiit órtelgen degen boljam bar.
Qazirgi tańda marqumnyń jubaiy, eki uly jáne olardyń dosy kúdikti retinde qamaýǵa alynǵan. Oqiǵanyń barlyq mán-jaiyn quqyq qorǵaý organdary anyqtap jatyr.
