Aqtóbe oblysynda pnevmoniiadan 62 adam kóz jumdy. Qazir 27 adam jansaqtaý bóliminde jatyr, dep habarlaidy "Ult aqparat".
Aqtóbe oblysynyń ákimi Ońdasyn Orazalin tikelei efirge shyǵyp, halyqqa jalpy ahýaldy túsindirdi.
«Oblysta 109 naýqas koronavirýs infektsiiasynan em alyp jatyr. Olardyń 8-i – jansaqtaý bóliminde, 2-eýi jasandy tynys alý apparatyna qosylǵan. Óńir zerthanalarynda 100 myńnan astam adamnyń synamasy saraptaldy. Sonyń nátijesinde indet juqtyrǵandar qatary erte anyqtaldy. Karantindi jeńildetý, sanitariia talaptarynyń saqtalmaýynan sońǵy eki aptada pnevmoniiaǵa shaldyqqandar sany kúrt artty. Qazir provizorlar men kúndizgi statsionarlarda 1300-den astam adam em alyp jatyr. Maýsym aiynda 464 adam emdelip shyqty. Ókinishtisi, 62 adam kóz jumdy. Basym bóliginde aýrýy asqynǵan. Osyǵan sáikes birneshe shara qoldanyldy», - dedi oblys ákimi Ońdasyn Orazalin.
Birinshiden, qosymsha 1926 kereýet daiyndaldy. Onda 1355 adam em alyp jatyr. Taǵy 150 oryndyq emdeý mekemesin qosý josparda bar. 1 tamyzǵa deiin qosymsha 200 tósek-oryn daiyndalady.
Ekinshiden, emhanalar janynan ashylǵan kúndizgi statsionarlar kúnine 100-200 adamdy qabyldai alady.
«Túsinistik pen sabyrlyq tanytyp, dárigerlerge demeý bolaiyq. Syrttan kelip, eshkim kómek qolyn sozbaidy, járdem bermeidi. Bárin ózimizdiń dárigerler aman alyp shyǵady. «Qyryq jyl qyrǵyn bolsa da, ajaldy óledi» degen atalarymyz. Bul – sońǵy úkim emes. Jazylyp shyqqan adamdar sany basym. Memleket basshysynyń maǵan bergen tártiptik sharasyn durys dep esepteimin. Jáne de budan tiisti qorytyndy shyǵaryp, jumysty odan ári kúsheite túsetin bolamyz», - dedi oblys ákimi.
