اقتٶبە وبلىسىندا پنەۆمونييادان 62 ادام كٶز جۇمدى. قازٸر 27 ادام جانساقتاۋ بٶلٸمٸندە جاتىر, دەپ حابارلايدى "ۇلت اقپارات".
اقتٶبە وبلىسىنىڭ ەكٸمٸ وڭداسىن ورازالين تٸكەلەي ەفيرگە شىعىپ, حالىققا جالپى احۋالدى تٷسٸندٸردٸ.
«وبلىستا 109 ناۋقاس كوروناۆيرۋس ينفەكتسيياسىنان ەم الىپ جاتىر. ولاردىڭ 8-ٸ – جانساقتاۋ بٶلٸمٸندە, 2-ەۋٸ جاساندى تىنىس الۋ اپپاراتىنا قوسىلعان. ٶڭٸر زەرتحانالارىندا 100 مىڭنان استام ادامنىڭ سىناماسى ساراپتالدى. سونىڭ نەتيجەسٸندە ٸندەت جۇقتىرعاندار قاتارى ەرتە انىقتالدى. كارانتيندٸ جەڭٸلدەتۋ, سانيتارييا تالاپتارىنىڭ ساقتالماۋىنان سوڭعى ەكٸ اپتادا پنەۆمونيياعا شالدىققاندار سانى كٷرت ارتتى. قازٸر پروۆيزورلار مەن كٷندٸزگٸ ستاتسيونارلاردا 1300-دەن استام ادام ەم الىپ جاتىر. ماۋسىم ايىندا 464 ادام ەمدەلٸپ شىقتى. ٶكٸنٸشتٸسٸ, 62 ادام كٶز جۇمدى. باسىم بٶلٸگٸندە اۋرۋى اسقىنعان. وسىعان سەيكەس بٸرنەشە شارا قولدانىلدى», - دەدٸ وبلىس ەكٸمٸ وڭداسىن ورازالين.
بٸرٸنشٸدەن, قوسىمشا 1926 كەرەۋەت دايىندالدى. وندا 1355 ادام ەم الىپ جاتىر. تاعى 150 ورىندىق ەمدەۋ مەكەمەسٸن قوسۋ جوسپاردا بار. 1 تامىزعا دەيٸن قوسىمشا 200 تٶسەك-ورىن دايىندالادى.
ەكٸنشٸدەن, ەمحانالار جانىنان اشىلعان كٷندٸزگٸ ستاتسيونارلار كٷنٸنە 100-200 ادامدى قابىلداي الادى.
«تٷسٸنٸستٸك پەن سابىرلىق تانىتىپ, دەرٸگەرلەرگە دەمەۋ بولايىق. سىرتتان كەلٸپ, ەشكٸم كٶمەك قولىن سوزبايدى, جەردەم بەرمەيدٸ. بەرٸن ٶزٸمٸزدٸڭ دەرٸگەرلەر امان الىپ شىعادى. «قىرىق جىل قىرعىن بولسا دا, اجالدى ٶلەدٸ» دەگەن اتالارىمىز. بۇل – سوڭعى ٷكٸم ەمەس. جازىلىپ شىققان ادامدار سانى باسىم. مەملەكەت باسشىسىنىڭ ماعان بەرگەن تەرتٸپتٸك شاراسىن دۇرىس دەپ ەسەپتەيمٸن. جەنە دە بۇدان تيٸستٸ قورىتىندى شىعارىپ, جۇمىستى ودان ەرٸ كٷشەيتە تٷسەتٸن بولامىز», - دەدٸ وبلىس ەكٸمٸ.
